2026 தமிழக சட்டமன்றத் தேர்தல் நெருங்கி வரும் நிலையில் அரசியல் களம் நாளுக்கு நாள் சூடுபிடித்து வருகிறது. குறிப்பாக திமுக கூட்டணியில் தேமுதிக இணைந்திருப்பது இந்த தேர்தலுக்கு புதிய பரபரப்பை ஏற்படுத்தியுள்ளது. திமுக தலைமையிலான கூட்டணி பெரிய கூட்டணி பலத்துடன் தேர்தலை எதிர்கொள்ள தயாராகி வரும் நிலையில், கட்சிக்குள் இன்னொரு முக்கிய அரசியல் விவாதம் எழுந்துள்ளது. அது கனிமொழியின் சட்டமன்றத் தேர்தல் போட்டி தொடர்பானது.

தற்போது தூத்துக்குடி மக்களவை உறுப்பினராகவும், திமுக தென்மண்டல பொறுப்பாளராகவும் செயல்பட்டு வரும் கனிமொழி, 2026 சட்டமன்றத் தேர்தலில் போட்டியிட விருப்பம் தெரிவித்துள்ளார் என தகவல்கள் வெளியாகியுள்ளன. அவரது ஆதரவாளர்கள் தூத்துக்குடி மற்றும் திருநெல்வேலி உள்ளிட்ட தென் மாவட்ட தொகுதிகளில் அவருக்காக விருப்ப மனுக்கள் அளித்துள்ளதாக கூறப்படுகிறது.

கடந்த சில ஆண்டுகளாக தென் மாவட்டங்களில் கனிமொழி தொடர்ந்து சுற்றுப்பயணம் மேற்கொண்டு கட்சித் திட்டங்களை முன்னெடுத்து வந்துள்ளார். இதனால் அந்த பகுதிகளில் அவருக்கு கிடைத்த வரவேற்பு, மாநில அரசியலில் நேரடியாக களம் இறங்க வேண்டும் என்ற எண்ணத்தை உருவாக்கியுள்ளதாக அரசியல் வட்டாரங்கள் கூறுகின்றன.

மேலும், சமீபத்தில் திமுக – காங்கிரஸ் கூட்டணியில் ஏற்பட்ட சிக்கலை தீர்க்க ராகுல் காந்தி உள்ளிட்ட காங்கிரஸ் தலைவர்களுடன் பேச்சுவார்த்தை நடத்தி கூட்டணியை உறுதி செய்யவும் கனிமொழி முக்கிய பங்கு வகித்ததாக கூறப்படுகிறது.

அதோடு, தற்போது திமுக தேர்தல் அறிக்கை தயாரிக்க கனிமொழி தலைமையில் 10 பேர் கொண்ட குழு அமைக்கப்பட்டுள்ளதும் அவரது அரசியல் முக்கியத்துவத்தை காட்டுகிறது.

ஆனால், கனிமொழி மாநில அரசியலில் நேரடியாக களம் இறங்குவது குறித்து திமுக தலைமையின் நிலைப்பாடு தெளிவாக இல்லை என கூறப்படுகிறது. கட்சித் தலைமை அவரை டெல்லி அரசியலின் முக்கிய முகமாகவே வைத்திருக்க விரும்புகிறது எனவும் தகவல்கள் வெளியாகின்றன.

அதே நேரத்தில், கனிமொழி சட்டமன்ற உறுப்பினராக வந்தால் அது கட்சியின் எதிர்கால தலைமையைச் சுற்றிய அரசியல் கணக்குகளில் மாற்றம் ஏற்படுத்தக்கூடும் என்ற கவலையும் சில தரப்பில் இருப்பதாக கூறப்படுகிறது.

இதற்கிடையில் திருச்செந்தூர், பாளையங்கோட்டை, தூத்துக்குடி, நெல்லை, விருதுநகர், திருவாரூர் உள்ளிட்ட சில தொகுதிகளை கனிமொழி தனது போட்டிக்கான விருப்பத் தொகுதிகளாக பரிசீலித்து வருவதாகவும் தகவல்கள் வெளியாகியுள்ளன.ஆனால் இதுவரை திமுக தலைமை எந்த தொகுதியிலும் அவருக்கு அதிகாரப்பூர்வ ஒப்புதல் அளிக்கவில்லை.

இதனால் ஒரு முக்கிய கேள்வி எழுந்துள்ளது: கனிமொழி இந்த முறை சட்டமன்றத் தேர்தலில் களம் இறங்குவாரா?
 அல்லது டெல்லி அரசியலிலேயே தொடர்ந்து செயல்படுவாரா?

இந்த கேள்விக்கு பதில் கிடைக்கும் வரை திமுக வட்டாரங்களில் இந்த விவகாரம் பெரிய அரசியல் விவாதமாகவே நீடிக்கும் என கூறப்படுகிறது.