அதிமுகவின் பழமையான தூண்களில் ஒருவராகப் போற்றப்பட்ட கே.ஏ. செங்கோட்டையன், 1977 முதல் தொடர்ச்சியாக ஒன்பது முறை சட்டமன்ற உறுப்பினராக பதவி வகித்த அனுபவச் சின்னம். ஜெயலலிதா மறைவுக்குப் பிறகு அமைப்பு செயலாளராக உயர்ந்து இருந்த அவருக்கும், தற்போது பொதுச் செயலாளராக இருக்கும் எடப்பாடி பழனிசாமிக்கும் இடையே சிந்தனைப் பிளவை உருவாக்கியதில், கட்சிப் பதவிகளிலிருந்து நீக்கப்பட்டு பின்னர் கட்சியிலிருந்தே விலக்கப்பட்டார்.

இதன் பின்னர் அவருடன் இணைந்த ஆதரவாளர்களும் அகற்றப்பட்டனர். இந்த நடவடிக்கைகள் செங்கோட்டையனின் அதிருப்தியை அதிகரித்தன.இதற்கிடையில் அவர் விஜய் தலைமையிலான த.வெ.க.வுக்கு செல்லலாம் என்ற தகவல்கள் தீவிரம் பெற்றன. கேள்வி எழுப்பியபோதும், அவரது தரப்பிலோ தவெக தரப்பிலோ உறுதி அல்லது மறுப்பு எதுவும் வெளியாகவில்லை.

இதனால் அவர் அக்கட்சியில் இணைய உள்ளார் எனும் ஊகங்கள் வலுத்தன. இறுதியில், தனது எம்.எல்.ஏ. பதவியை திடீரென ராஜினாமா செய்தது, அந்த மாற்றத்திற்கான நேரடி அறிவிப்பாகவே கருதப்பட்டது.இன்று காலை, பனையூரில் உள்ள த.வெ.க. அலுவலகத்தை செங்கோட்டையன் நூற்றுக்கணக்கான ஆதரவாளர்களுடன் சென்றடைந்தார். ஆதவ் அர்ஜுனா மற்றும் புஸ்சி ஆனந்த் அவரை அன்போடு வரவேற்றனர்.

பின்னர் Vijay-யை சந்தித்து, முன்னாள் எம்பி சத்யபாமா உட்பட 50க்கும் மேற்பட்ட ஆதரவாளர்களுடன் அதிகாரப்பூர்வமாக த.வெ.க.வின் கட்சி கொடியின் கீழ் இணைந்தார்.கட்சியின் நிர்வாகக்குழு தலைமை ஒருங்கிணைப்பாளராகவும், கோவை – ஈரோடு – திருப்பூர் – நீலகிரி என நான்கு முக்கிய மாவட்டங்களுக்கு அமைப்பு பொதுச் செயலாளராகவும் பொறுப்பு வழங்கப்படுவதாக தகவல்கள் தெரிவிக்கின்றன.

இதற்கு இணையாக, செங்கோட்டையனை வரவேற்று விஜய் வெளியிட்ட வீடியோவும் தற்போது பரபரப்பை கூட்டியுள்ளது. அந்த பதிவில்,"
இளமையில் சட்டமன்ற பொறுப்பை ஏற்றவர்,
அதிமுகவில் இரு முன்னோடி தலைவர்களின் முழு நம்பிக்கையும் பெற்றவர்,
அரை நூற்றாண்டுக்கு மேல் ஒரே இயக்கத்தில் இருந்து இன்று தவெகவில் இணைந்தவர்…என்று வர்ணித்த அவர், "செங்கோட்டையனின் பல்லாண்டு அரசியல் அனுபவம் எங்கள் இயக்கத்துக்கு வலுசேர்க்கும். நல்லது நடக்கும், வெற்றி நிச்சயம்" என உற்சாகம் தெரிவித்துள்ளார்.

pic.twitter.com/NwUN91AxkW

— TVK Vijay (@TVKVijayHQ) November 27, 2025