நடிகர் விஜய் தமிழக வெற்றிக் கழகத்தை தொடங்கிய பிறகு, இனிமேல் சினிமாவில் நடிக்காமல் முழுமையாக அரசியலில் கவனம் செலுத்தப் போவதாக அறிவித்தது ரசிகர்களிடையே கலவையான எதிர்வினைகளை ஏற்படுத்தியது. ஒரு பக்கம் அவரது அரசியல் பயணத்துக்கு ஆதரவு தெரிவித்தாலும், மற்றொரு பக்கம் அவர் சினிமாவை விட்டு விலகுவது ரசிகர்களுக்கு ஏமாற்றமாகவும் இருந்தது.

இந்த நிலையில், அண்மையில் நடைபெற்ற ஒரு விருது வழங்கும் விழாவில் கலந்து கொண்ட நடிகை சுவாசிகா கூறிய கருத்து தற்போது சமூக வலைதளங்களில் கவனம் பெற்றுள்ளது. நிகழ்ச்சியின் போது, “தமிழ் சினிமாவில் இருந்து ஒரு நடிகரை மலையாள சினிமாவுக்கு அழைத்துச் செல்ல வாய்ப்பு கிடைத்தால் யாரை தேர்வு செய்வீர்கள்?” என்று அவரிடம் கேள்வி எழுப்பப்பட்டது.

இதற்கு பதிலளித்த சுவாசிகா, “சினிமாவில் இனிமேல் நடிக்க மாட்டேன் என்று முடிவெடுத்துள்ள நடிகர் விஜய் சாரை மலையாள சினிமாவுக்கு அழைத்துச் செல்ல ஆசைப்படுகிறேன். அவர் வந்தால் அங்கு நாங்கள் அவரை மிகப்பெரிய அளவில் கொண்டாடுவோம்,” என்று கூறினார். அவரது இந்த பதில் நிகழ்ச்சியில் இருந்த ரசிகர்களிடையே பெரும் கைதட்டலையும் உற்சாகத்தையும் பெற்றது.

இதற்கிடையில், விஜய் தற்போது நடித்துள்ள கடைசி திரைப்படமாக கருதப்படும் “ஜனநாயகன்” படத்தின் வெளியீடும் ரசிகர்களிடையே எதிர்பார்ப்பை ஏற்படுத்தியுள்ளது. இந்த படம் ஜனவரி 9ஆம் தேதி வெளியாகும் என எதிர்பார்க்கப்பட்ட நிலையில், இன்னும் சென்சார் சான்றிதழ் கிடைக்காததால் வெளியீடு தாமதமாகியுள்ளது.

மேலும் தேர்தல் சூழ்நிலை காரணமாக, படத்திற்கு சென்சார் கிடைத்தாலும் தேர்தல் முடியும் வரை வெளியிடப்பட வாய்ப்பில்லை என்ற தகவலும் வெளியாகியுள்ளது. இதனால் இந்த படம் மே மாதம் அல்லது விஜய்யின் பிறந்தநாளான ஜூன் மாதத்தில் வெளியாகலாம் என கூறப்படுகிறது.

இந்நிலையில், தேர்தலில் பிஸியாக இருக்கும் விஜய் மீண்டும் சினிமாவுக்கு திரும்புவாரா என்ற கேள்வியும் ரசிகர்களிடையே தொடர்ந்து எழுந்துகொண்டே இருக்கிறது. தேர்தல் முடிவுகள் எப்படி இருந்தாலும் அவர் தொடர்ந்து திரைப்படங்களில் நடிக்க வேண்டும் என்ற எதிர்பார்ப்பு ரசிகர்களிடம் இன்னும் குறையவில்லை என்பது குறிப்பிடத்தக்கது.