தமிழ் சினிமாவின் ஆகச்சிறந்த அரசியல் நையாண்டித் திரைப்படமான 'அமைதிப்படை', 2026 சட்டமன்றத் தேர்தல் களத்தில் மீண்டும் ரசிகர்களைச் சந்திக்கத் தயாராகிவிட்டது. மணிவண்ணன் இயக்கத்தில் சத்யராஜ் இரட்டை வேடங்களில் நடித்த இந்தப் படம், நவீனத் தொழில்நுட்பத்துடன் மெருகேற்றப்பட்டு திரையரங்குகளில் வெளியாகவுள்ளது.

புதுப்பொலிவுடன் கிளாசிக் திரைப்படம்:
கடந்த 1994-ஆம் ஆண்டு வெளியான 'அமைதிப்படை', எக்காலத்திற்கும் பொருந்தும் யதார்த்தமான அரசியல் வசனங்களுக்காக இன்றும் கொண்டாடப்படுகிறது. தற்போது ஸ்பேரோ சினிமாஸ் சார்பில் கார்த்திக் வெங்கடேசன், இப்படத்தைப் நவீன 4K தொழில்நுட்பம் மற்றும் டால்பி ஒலியுடன் (Dolby Sound) புதுப்பித்துள்ளார்.

டிரெய்லர் வெளியீடு: மார்ச் 30, 2026, திரையரங்குகளில் வெளியீடு: ஏப்ரல் 10, 2026

ஏன் இந்த ரீ-ரிலீஸ்?
தமிழகத்தில் ஏப்ரல் 23-ஆம் தேதி தேர்தல் நடைபெறவுள்ள சூழலில், 'அமாவாசை' என்கிற நாகராஜ சோழனின் அரசியல் சதுரங்க ஆட்டத்தைத் திரையில் காண்பது ரசிகர்களுக்குத் தேர்தல் கால விருந்தாக அமையும். சத்யராஜின் அபார நடிப்பு, மணிவண்ணனின் நக்கலான அரசியல் வசனங்கள் மற்றும் இளையராஜாவின் இசை என அனைத்தும் 4K தரத்தில் மீண்டும் ஒரு புதிய அனுபவத்தைத் தரும் என்பதில் சந்தேகமில்லை.