ஈரான் போரின் உலகளாவிய தாக்கத்தால் ஏற்படவுள்ள கடுமையான எரிபொருள் தட்டுப்பாடு விவகாரத்தில், மத்திய மற்றும் மாநில அரசுகள் தங்களது அரசியல் வேறுபாடுகளைக் கடந்து இணைந்து செயல்பட வேண்டும் என்று மக்கள் நீதி மய்யத்தின் தலைவரும், மாநிலங்களவை உறுப்பினருமான கமல்ஹாசன் வெள்ளிக்கிழமை அன்று வீடியோ ஒன்றின் மூலம் உருக்கமான வேண்டுகோள் விடுத்துள்ளார்.

உலகளாவிய நெருக்கடியும் இந்தியாவின் நிலையும்:
தற்போதைய போர்ச் சூழல் குறித்து ஆழ்ந்த கவலை கொண்ட ஒரு குடிமகனாகப் பேசுவதாகக் குறிப்பிட்டுள்ள கமல்ஹாசன், சர்வதேச அளவில் எழுந்துள்ள இந்த சவாலை எதிர்கொள்ள ஏற்கனவே உலக நாடுகள் தயாராகி வருவதைச் சுட்டிக்காட்டினார்:

India has overcome wars, shortages, and global crises before - through unity and shared sacrifice. This moment calls for the same national spirit again. 🇮🇳 pic.twitter.com/Mi56m0I4pD

— Kamal Haasan (@ikamalhaasan) May 22, 2026

உலக நாடுகளின் முன்னெச்சரிக்கை: ஈரான் போரின் தாக்கத்தால் உலக அளவில் 60-க்கும் மேற்பட்ட நாடுகள் ஏற்கனவே தங்களது நாடுகளில் எரிசக்தி சேமிப்பு விதிகளை மிகத் தீவிரமாக அமல்படுத்தியுள்ளன. வரவிருக்கும் இக்கட்டான காலங்களை எதிர்கொள்ளத் தயாராக இருக்குமாறு சிங்கப்பூர் பிரதமரும் தன் நாட்டு மக்களைக் கேட்டுக்கொண்டுள்ளார்.

பிரதமரின் பாராட்டு: நமது பாரதப் பிரதமரும் நாட்டை எரிசக்தியைச் சேமிக்குமாறு வலியுறுத்தியுள்ளார். முன்னாள் பிரதமர் வாஜ்பாய் கூறியது போல, 'அரசாங்கங்கள் வரும், போகும்; ஆனால் நாடு நிலைத்திருக்கும்'. எனவே, இந்த இக்கட்டான நேரத்தில் கட்சி அரசியலுக்கு அப்பாற்பட்டு தேசத்தின் மீதான பொறுப்புடன் நாம் செயல்பட வேண்டும்.

மத்திய அரசின் பணிகளுக்கு வரவேற்பு: ஒரு நடுநிலையாளராக, பிரதமரின் கடந்த பத்தாண்டு கால ஆட்சியில் இந்தியாவின் சூரிய மற்றும் காற்றாலை ஆற்றல் திறன் அதிகரித்திருப்பதையும், நிலக்கரி மற்றும் அணுசக்தியில் சமீபத்தில் செய்யப்பட்டுள்ள முதலீடுகளையும் நான் மனதார வரவேற்கிறேன்.

கமல்ஹாசன் முன்வைக்கும் 2 முக்கிய கோரிக்கைகள்:
எரிசக்தி தட்டுப்பாட்டின் சுமையை மக்கள் மீது மட்டுமே சுமத்தக் கூடாது; அரசாங்கங்களும் இதில் பொறுப்பேற்க வேண்டும் என்று வலியுறுத்திய அவர், அனைத்து மாநில முதலமைச்சர்களையும் அழைத்து உடனடியாக ஒரு தேசிய மாநாட்டைப் பிரதமர் கூட்ட வேண்டும் எனக் கேட்டுக்கொண்டார். மேலும், எளிய மக்களைப் பாதுகாக்க இரண்டு அவசர நடவடிக்கைகளை மேற்கொள்ள வலியுறுத்தினார்:

வரிக்குறைப்பு: ஏழை மற்றும் நடுத்தர மக்களின் சுமையைக் குறைக்க, பெட்ரோல் மற்றும் டீசல் மீதான மதிப்புக்கூட்டு வரி (VAT) போன்ற மாநில அரசுகளின் வரிகள் உடனடியாகக் குறைக்கப்பட வேண்டும்.

பொதுப் போக்குவரத்து கட்டணக் குறைப்பு: பொதுமக்கள் தங்களது தனிநபர் வாகனப் பயன்பாட்டைக் குறைத்து, பொதுப் போக்குவரத்திற்கு மாறுவதை ஊக்குவிக்கும் வகையில் ரயில், மெட்ரோ மற்றும் பேருந்துக் கட்டணங்கள் கணிசமாகக் குறைக்கப்பட வேண்டும்.

தேசத்தின் நலனைக் கருத்தில்கொண்டு, இந்த இக்கட்டான சூழலில் மத்திய-மாநில அரசுகள் ஒருங்கிணைந்து செயல்படுவதே எளிய மக்களைக் காப்பதற்கான ஒரே வழி என்று கமல்ஹாசன் தனது வீடியோ பதிவில் திட்டவட்டமாகக் குறிப்பிட்டுள்ளார்.