மேற்கு வங்காள அரசியலில் பெரும் திருப்பத்தை ஏற்படுத்திய சட்டப்பேரவைத் தேர்தலுக்குப் பிறகு, புதிய பாஜக அரசின் அமைச்சராக பொறுப்பேற்றுள்ள சங்கர் கோஷ், முன்னாள் முதலமைச்சர் மம்தா பானர்ஜி மற்றும் திரிணாமுல் காங்கிரஸ் கட்சியை கடுமையாக விமர்சித்துள்ளார்.

2026-ஆம் ஆண்டு நடைபெற்ற மேற்கு வங்காள சட்டப்பேரவைத் தேர்தலில், நீண்டகாலமாக ஆட்சியில் இருந்த திரிணாமுல் காங்கிரஸ் கட்சி எதிர்பாராத பின்னடைவை சந்தித்தது. பெரும்பான்மை இடங்களை கைப்பற்றிய பாஜக முதல்முறையாக மாநில ஆட்சிப் பொறுப்பை ஏற்றது.

அதிர்ச்சியளிக்கும் வகையில், மம்தா பானர்ஜி தனது சொந்த தொகுதியிலேயே தோல்வியை சந்தித்தது மாநில அரசியலில் முக்கிய நிகழ்வாக அமைந்தது.தேர்தல் தோல்விக்குப் பின்னர் திரிணாமுல் காங்கிரஸ் கட்சிக்குள் அதிருப்திக் குரல்கள் அதிகரித்துள்ளதாக தகவல்கள் வெளியாகியுள்ளன.

கட்சியின் பல்வேறு நிர்வாகிகள் மற்றும் சட்டப்பேரவை உறுப்பினர்கள் தலைமையின் செயல்பாடுகள் குறித்து கேள்வி எழுப்பிய நிலையில், கட்சியின் அமைப்பு கட்டமைப்புகளை கலைத்து மறுசீரமைக்கும் நடவடிக்கைகளை மம்தா பானர்ஜி மேற்கொண்டுள்ளதாக தெரிவிக்கப்படுகிறது.

இந்த சூழலில் செய்தியாளர்களிடம் பேசிய அமைச்சர் சங்கர் கோஷ், “மம்தா பானர்ஜியை அரசியல் அதிகாரத்தில் இருந்து அகற்றியது எந்த ஒரு கட்சியும் அல்ல; மேற்கு வங்காள மக்களே தங்களது வாக்குச் சக்தியின் மூலம் அந்த முடிவை எடுத்துள்ளனர்” என்று தெரிவித்தார்.

மேலும், மம்தா தலைமையிலான 15 ஆண்டுகால ஆட்சிக்கு மக்கள் இறுதிக்கட்ட தீர்ப்பை வழங்கியுள்ளதாக குறிப்பிட்ட அவர், அந்த ஆட்சிக் காலத்தில் மாணவர்களிடையே தேசிய உணர்வையும் நாட்டுப்பற்றையும் வளர்க்கும் முயற்சிகள் போதிய அளவில் முன்னெடுக்கப்படவில்லை என்றும் குற்றம்சாட்டினார்.

பள்ளிக் கல்வியில் நாட்டின் சாதனைகள் மற்றும் வரலாற்று பெருமைகளுக்கு முக்கியத்துவம் வழங்குவதற்குப் பதிலாக, அரசியல் போராட்டங்கள் மற்றும் குறிப்பிட்ட நிகழ்வுகளுக்கு அதிக இடம் அளிக்கப்பட்டதாகவும் அவர் விமர்சித்தார்.

புதிய அரசின் முக்கிய இலக்குகளில் ஒன்றாக அரசுப் பள்ளிகள் மீதான மக்களின் நம்பிக்கையை மீட்டெடுப்பது இருக்கும் என்றும், கல்வி, பண்பாடு மற்றும் தேசிய உணர்வை வலுப்படுத்தும் நிர்வாகத்தை உருவாக்க நடவடிக்கைகள் மேற்கொள்ளப்படும் என்றும் சங்கர் கோஷ் தெரிவித்தார்.

“மக்களின் எதிர்பார்ப்புகளை நிறைவேற்றத் தவறிய ஆட்சிக்கு மக்கள் ஜனநாயக முறையில் பதிலடி கொடுத்துள்ளனர். இனி மக்கள் மையப்படுத்தப்பட்ட நிர்வாகமே மேற்கு வங்காளத்தில் நடைபெறும்” என்றும் அவர் கூறினார்.

தேர்தல் தோல்விக்குப் பிறகு உருவான அரசியல் பரபரப்பின் தொடர்ச்சியாக மாநில அரசியல் களம் சூடுபிடித்துள்ள நிலையில், மம்தா பானர்ஜி குறித்து சங்கர் கோஷ் முன்வைத்துள்ள கருத்துகள் அரசியல் வட்டாரங்களில் புதிய விவாதங்களை கிளப்பியுள்ளன.