தேமுதிக யாருடன் கூட்டணி சேரும் என்பது இன்னும் மர்மமாகவே உள்ள நிலையில், அதிமுக மற்றும் பாஜக தலைவர்கள் அளித்துள்ள முரணான பதில்கள் தமிழக அரசியலில் பெரும் குழப்பத்தை ஏற்படுத்தியுள்ளன.

மாநில அளவில் உடன்பாடு எட்டப்படாததால், டெல்லி பாஜக தலைமையே தேமுதிகவிடம் நேரடியாகப் பேசி வருவதாகத் திண்டுக்கல் சீனிவாசன் தெரிவித்தார். இது நல்லபடியாக முடியும் என அதிமுக எதிர்பார்ப்பதாகவும் அவர் குறிப்பிட்டார்.

ஆனால், பாஜக மாநிலத் தலைவர் நயினார் நாகேந்திரன் இதனை முற்றிலுமாக மறுத்துள்ளார். "தேமுதிகவுடன் இதுவரை கூட்டணிப் பேச்சுவார்த்தை நடத்தப்படவில்லை; சுதீஷ் என் நண்பர் என்பதால் மட்டுமே அவருடன் பேசினேன்" என அவர் விளக்கம் அளித்துள்ளார்.

தேமுதிக பொதுச்செயலாளர் பிரேமலதா விஜயகாந்த், அனைத்துக் கட்சிகளுடனும் பேச்சுவார்த்தை நடப்பதாகக் கூறி வருகிறார்.

"தேமுதிக சேரும் கூட்டணியே வெற்றிபெறும்" எனத் தனது கட்சியின் முக்கியத்துவத்தைத் தொடர்ந்து அவர் வலியுறுத்தி வருகிறார்.

மார்ச் 1-ல் 'கிளைமாக்ஸ்'?
பிரதமர் மோடி வரும் மார்ச் 1-ஆம் தேதி தமிழகம் வரவுள்ளார். அப்போது கூட்டணி குறித்த இறுதி முடிவுகள் எட்டப்படலாம் எனவும், தேமுதிகவைத் தேர்தல் மேடையில் பார்க்க வாய்ப்புள்ளதா என்ற கேள்விக்கு "பார்க்கலாம்" எனவும் நயினார் நாகேந்திரன் சூசகமாகத் தெரிவித்துள்ளார்.

"கூட்டணி குறித்து ஒருபுறம் அதிமுக 'டீல்' ஓகே என்கிறது, மறுபுறம் பாஜக 'ஒண்ணுமே நடக்கல' என்கிறது. இந்த முரண்பாடுகளுக்கு நடுவே தேமுதிக யாரைத் தேர்ந்தெடுக்கப்போகிறது என்பதே இப்போதைய ஹாட் டாபிக்!"