உடலின் சீரான இயக்கத்துக்குத் தேவையான முக்கிய ஹார்மோன்களைச் சுரக்கும் அட்ரினல் சுரப்பிகள் பாதிக்கப்படும்போது உருவாகும் அரிய பாதிப்பே அடிசன் நோய் எனப்படுகிறது. இதனை முதன்மை அட்ரினல் பற்றாக்குறை என்றும் அழைக்கின்றனர்.

சிறுநீரகங்களுக்கு மேலே அமைந்துள்ள சிறிய அளவிலான அட்ரினல் சுரப்பிகள், உடலின் பல்வேறு முக்கிய செயல்பாடுகளைச் சீராக வைத்திருக்க உதவும் ஹார்மோன்களைச் சுரக்கின்றன. குறிப்பாக, மன அழுத்தத்தைச் சமாளித்தல், ரத்த அழுத்தத்தைப் பராமரித்தல், உடலின் வளர்சிதை மாற்றத்தை ஒழுங்குபடுத்துதல் உள்ளிட்ட பணிகளில் முக்கியப் பங்கு வகிக்கும் ஹார்மோன்கள் போதுமான அளவில் சுரக்காமல் போகும்போது இந்த நோய் உருவாகிறது.

அடிசன் நோயின் ஆரம்ப அறிகுறிகள் பல நேரங்களில் சாதாரண உடல்நலக் குறைபாடுகளைப் போலவே காணப்படுவதால், நோயை ஆரம்ப நிலையிலேயே கண்டறிவது சற்று கடினமாக இருக்கலாம்.தொடர்ச்சியான சோர்வு, உடல் பலவீனம், பசியின்மை, உடல் எடை குறைதல், மனநிலையில் மாற்றம், அதிக தாகம் போன்றவை ஆரம்ப அறிகுறிகளாக இருக்கலாம். நோய் தீவிரமடையும் நிலையில் தலைச்சுற்றல், மயக்கம், தசைப்பிடிப்பு, மிகுந்த களைப்பு போன்ற பாதிப்புகள் ஏற்படலாம். சிலருக்கு சருமம், உதடுகள் மற்றும் உடலின் சில பகுதிகள் வழக்கத்தைவிட கருமையாக மாறுவதையும் கவனிக்க முடியும்.

நோய் ஏற்படுவதற்கான முக்கிய காரணங்கள்
அடிசன் நோய் ஏற்படுவதற்கு பல்வேறு காரணங்கள் இருக்கலாம். அவற்றில் முக்கியமானது, உடலின் நோய் எதிர்ப்பு அமைப்பு தவறுதலாக அட்ரினல் சுரப்பிகளைத் தாக்கி சேதப்படுத்துவதாகும். இதன் காரணமாக அத்தியாவசிய ஹார்மோன்களின் உற்பத்தி படிப்படியாகக் குறைகிறது.இதுதவிர, காசநோய் உள்ளிட்ட சில தீவிர நோய்த்தொற்றுகள் அட்ரினல் சுரப்பிகளைப் பாதிப்பதாலும் இந்த நோய் உருவாக வாய்ப்புள்ளது. ஆண்களைவிட பெண்களிடம் அடிசன் நோய் அதிகமாகக் காணப்படுவதாக மருத்துவத் தகவல்கள் தெரிவிக்கின்றன.

வாழ்நாள் முழுவதும் தொடரும் சிகிச்சை
அடிசன் நோயால் பாதிக்கப்பட்டவர்கள் உடலில் குறைவாகச் சுரக்கும் ஹார்மோன்களுக்கு மாற்றாக மருத்துவர் பரிந்துரைக்கும் மருந்துகளைத் தொடர்ந்து எடுத்துக்கொள்ள வேண்டும்.

முறையான சிகிச்சை, மருத்துவக் கண்காணிப்பு மற்றும் தேவையான முன்னெச்சரிக்கை நடவடிக்கைகளைப் பின்பற்றினால், பெரும்பாலானோர் இயல்பான வாழ்க்கை முறையைத் தொடர முடியும்.ஆனால், பரிந்துரைக்கப்பட்ட மருந்துகளைத் தவிர்ப்பது, திடீரென மருந்தை நிறுத்துவது அல்லது உடலுக்கு கடுமையான அழுத்தத்தை ஏற்படுத்தும் நோய், தொற்று போன்றவை ஏற்படும்போது ஹார்மோன் அளவு வேகமாகக் குறையலாம்.

இதனால் உயிருக்கு ஆபத்தை ஏற்படுத்தக்கூடிய அட்ரினல் நெருக்கடி எனப்படும் அவசரநிலை உருவாகக்கூடும்.கடுமையான வாந்தி அல்லது குமட்டல், திடீர் பலவீனம், தலைச்சுற்றல், குழப்பநிலை, மயக்கம், காய்ச்சல் உள்ளிட்ட அறிகுறிகள் தீவிரமாகத் தோன்றினால், வீட்டிலேயே சிகிச்சை மேற்கொள்ளாமல் உடனடியாக அவசர மருத்துவ உதவியை நாடுவது மிகவும் அவசியம்.

அடிசன் நோயின் அறிகுறிகள் பல பொதுவான உடல்நலப் பிரச்சனைகளுடன் ஒத்திருக்கக்கூடும் என்பதால், நீடித்த சோர்வு, காரணமில்லாத உடல் எடை குறைதல், அடிக்கடி தலைச்சுற்றல் போன்ற அறிகுறிகள் தொடர்ந்து இருந்தால் மருத்துவரை அணுகி உரிய பரிசோதனை செய்து கொள்வது பாதுகாப்பானது.