தமிழக சட்டப்பேரவைத் தேர்தலை முன்னிட்டு பாஜக கட்சியில் வேட்பாளர் தேர்வு தொடர்பான குழப்பம் தீவிரமடைந்துள்ள நிலையில், பிரதமர் நரேந்திர மோடியின் சென்னை ரோட்ஷோ திடீரென ரத்து செய்யப்பட்டிருப்பது அரசியல் வட்டாரத்தில் கவனம் ஈர்த்துள்ளது.

அதிமுக கூட்டணியில் பாஜகவுக்கு 27 தொகுதிகள் ஒதுக்கப்பட்டிருந்தாலும், இன்னும் வேட்பாளர் பட்டியல் வெளியிடப்படாதது கட்சிக்குள் பரபரப்பை ஏற்படுத்தியுள்ளது. தொகுதிகள் ஒதுக்கப்பட்டு ஒரு வாரம் கடந்தும் இறுதி முடிவு எடுக்கப்படாததால், தொண்டர்கள் மற்றும் நிர்வாகிகள் மத்தியில் அதிருப்தி நிலவுகிறது.

வெற்றி வாய்ப்புள்ள தொகுதிகள் கிடைக்கவில்லை, ஒதுக்கப்பட்ட தொகுதிகளில் போட்டியிட சவால்கள் உள்ளன என்ற குற்றச்சாட்டுகளும் எழுந்துள்ளன. மேலும், முக்கிய தலைவர்கள் இடையே சீட் போட்டி அதிகரித்ததும் தேர்வு செயல்முறையை சிக்கலாக்கியுள்ளது.

இந்நிலையில், பிரதமர் மோடி இரண்டு நாள் பயணமாக தமிழகம் வருகிறார். ஏப்ரல் 3ஆம் தேதி சென்னை வந்த அவர், புதுச்சேரியில் ரோட்ஷோ நடத்த திட்டமிட்டுள்ளார். ஆனால் சென்னை மயிலாப்பூர் தொகுதியில் நடத்த திட்டமிட்டிருந்த ரோட்ஷோ மற்றும் பிரசாரம் தற்போது ரத்து செய்யப்பட்டுள்ளதாக தகவல்கள் வெளியாகியுள்ளன.

வேட்பாளர்கள் அறிவிக்கப்படாததே இதற்குக் காரணம் என கூறப்படுகிறது. அதற்கு பதிலாக, ஏப்ரல் 4ஆம் தேதி தமிழக பாஜக தலைவர்களுடன் தேர்தல் தொடர்பான முக்கிய ஆலோசனை நடத்த பிரதமர் முடிவு செய்துள்ளதாக தகவல்கள் தெரிவிக்கின்றன.

வேட்பாளர் தேர்வில் ஏற்பட்டுள்ள குழப்பம் குறித்து பிரதமர் மோடி அதிருப்தியுடன் உள்ளார் என்றும், தேர்தலுக்கு பிறகு தமிழக பாஜக அமைப்பில் மாற்றங்கள் செய்யப்பட வாய்ப்பு உள்ளதாகவும் அரசியல் வட்டாரங்கள் தெரிவிக்கின்றன.

இந்தச் சூழலில், பாஜக வேட்பாளர் பட்டியல் எப்போது வெளியாகும் என்பது முக்கியக் கேள்வியாக மாறியுள்ளது.