தமிழக அரசியலில் புதிய அத்தியாயத்தை தொடங்கியுள்ள தமிழக வெற்றிக்கழகத் தலைவர் விஜய், சட்டசபைத் தேர்தலில் 108 தொகுதிகளை கைப்பற்றி ஆட்சியின் மையப்புள்ளியாக உருவெடுத்துள்ளார். கூட்டணி மற்றும் ஆதரவு கட்சிகளின் துணையுடன் பெரும்பான்மையை உறுதிப்படுத்திய அவர், சென்னை நேரு உள் விளையாட்டு அரங்கில் இன்று தமிழகத்தின் முதலமைச்சராக பதவியேற்றார்.

ஆளுநர் பதவிப்பிரமாணம் செய்து வைத்த இந்த பிரமாண்ட விழாவில், அரசியல் தலைவர்கள், திரையுலக பிரபலங்கள், தொழில்துறை முன்னோடிகள் மற்றும் ஆயிரக்கணக்கான தொண்டர்கள் கலந்து கொண்டதால் அரங்கம் முழுவதும் கொண்டாட்டக் களமாக மாறியது.முதலமைச்சராக பொறுப்பேற்றுள்ள விஜய்க்கு நாடு முழுவதும் இருந்து வாழ்த்துகள் குவிந்து வருகின்றன. அந்த வரிசையில், தமிழக பாஜக தலைவர் நயினார் நாகேந்திரன் தனது எக்ஸ் தள பதிவின் மூலம் வாழ்த்து தெரிவித்துள்ளார்.

நயினார் நாகேந்திரன்:

அவரது பதிவில், “2026 தமிழக சட்டமன்றத் தேர்தலில் வெற்றி பெற்று தமிழக முதலமைச்சராக பொறுப்பேற்றுள்ள தமிழக வெற்றிக்கழகத் தலைவர் சி. ஜோசப் விஜய் அவர்களுக்கு என் மனமார்ந்த வாழ்த்துகளையும் பாராட்டுகளையும் தெரிவித்துக்கொள்கிறேன். தமிழக மக்களின் நலன் மற்றும் மாநில வளர்ச்சியை முன்னிலைப்படுத்தி, அடுத்த ஐந்து ஆண்டுகளில் மக்கள் நம்பிக்கையை நிறைவேற்றும் ஆட்சியை வழங்க வேண்டும்” என்று குறிப்பிட்டுள்ளார்.
மேலும், ஜனநாயக பொறுப்புணர்வுடனும் மக்கள் சேவையை முதன்மைப்படுத்தியும் செயல்பட்டு, தமிழகத்திற்கு முன்னேற்றப் பாதையை உருவாக்க வேண்டும் என அவர் வலியுறுத்தியதாக தெரிவிக்கப்படுகிறது.

அண்ணாமலை:
இதனிடையே, பாஜக முன்னாள் மாநிலத் தலைவர் அண்ணாமலையும் தனது வாழ்த்துகளை பதிவு செய்துள்ளார். எக்ஸ் தளத்தில் அவர் வெளியிட்டுள்ள பதிவில், “தமிழக முதலமைச்சராக பொறுப்பேற்றுள்ள தமிழக வெற்றிக்கழகத் தலைவர் விஜய் அவர்களுக்கும், அமைச்சர்களாக பதவியேற்கவுள்ள அனைவருக்கும், த.வெ.க. தொண்டர்களுக்கும் என் மனமார்ந்த நல்வாழ்த்துகள். தமிழகத்தின் வளர்ச்சிக்காக உங்கள் ஆட்சி சிறப்பாக அமையட்டும்” என்று தெரிவித்துள்ளார்.

நரேந்திர மோடி:
அதேபோல், தமிழக முதலமைச்சராக பதவியேற்றுள்ள விஜய்க்கு பிரதமர் நரேந்திர மோடியும் வாழ்த்து தெரிவித்துள்ளார். அவர் வெளியிட்டுள்ள செய்தியில், “தமிழ்நாடு முதலமைச்சராக பொறுப்பேற்றுள்ள சி. ஜோசப் விஜய்க்கு என் வாழ்த்துகள். அவரது ஆட்சிக்காலம் மக்கள் நலனுக்கும் மாநில முன்னேற்றத்திற்கும் பயனுள்ளதாக அமையட்டும். தமிழ்நாட்டு மக்களின் வாழ்க்கைத் தரத்தை உயர்த்த மத்திய அரசு தொடர்ந்து தமிழக அரசுடன் இணைந்து செயல்படும்” என்று குறிப்பிட்டுள்ளதாக தெரிவிக்கப்படுகிறது.