தமிழக அரசியலில் மீண்டும் சூடு பிடித்திருக்கும் பாஜக-அதிமுக கூட்டணியைச் சுற்றிய பரபரப்பில், அண்ணாமலை பெயர் மீண்டும் முன்னிலைக்கு வந்திருக்கிறது.

ஒருபுறம், புதிய மாநிலத் தலைவராக நியமிக்கப்பட்ட நயினார் நாகேந்திரன் டெல்லியில் பாஜக தேசிய தலைவர் ஜே.பி. நட்டாவைச் சந்தித்திருக்கிறார். அதே நேரத்தில், முன்னாள் தலைவர் அண்ணாமலை நேரடியாக டிடிவி தினகரனைச் சந்தித்தது பெரிய அரசியல் அதிர்ச்சியை ஏற்படுத்தியது.

 நயினாருக்கு எதிராக அண்ணாமலை மீண்டும் களம் இறங்கியிருக்கிறாரா என்ற கேள்விகள் எழுந்த நிலையில், தற்போது வந்திருக்கும் தகவல் என்னவென்றால் – வரவிருக்கும் சட்டமன்றத் தேர்தலை முன்னிட்டு அமைக்கப்பட்ட ஐந்து ஒருங்கிணைப்புக் குழுக்களை ஒருங்கிணைக்கும் முக்கிய பொறுப்பு அண்ணாமலைக்கு வழங்கப்பட்டுள்ளது.

 இதன் பொருள், கூட்டணி அரசியலில் அண்ணாமலை தான் முக்கிய ஒருங்கிணைப்பாளராக இருப்பார். டிடிவி தினகரன், ஓபிஎஸ், பாமக, தேமுதிக – யாருடனும் பேசி, இணக்கத்தை ஏற்படுத்துவது அவருடைய பொறுப்பு.

 மக்களவைத் தேர்தலில் உடைந்த கூட்டணி, சட்டமன்றத் தேர்தலுக்காக மீண்டும் கட்டமைக்கப்பட்டிருக்கும் நிலையில், எடப்பாடி பழனிசாமி வைத்த நிபந்தனைகள் காரணமாக அண்ணாமலை பதவி நீக்கம் செய்யப்பட்டார். ஆனால், இப்போது அவருக்கு மீண்டும் பெரிய பொறுப்பு கொடுக்கப்பட்டிருப்பது அவரது ஆதரவாளர்களுக்கு உற்சாகத்தை ஏற்படுத்தியுள்ளது.

 இதனால்தான் சமூக வலைதளங்களில், “நயினார் வந்தாலும், கூட்டணி அரசியலின் சூத்திரதாரி அண்ணாமலை தான்” என்று அவரது ஆதரவாளர்கள் பதிவுகள் போட்டுக் கொண்டிருக்கிறார்கள்.

மொத்தத்தில், அண்ணாமலை மீண்டும் பாஜக கூட்டணியின் கேம்-செஞ்சர் ஆக மாறிவிட்டார் என்பது தெளிவாகிறது.