அதிமுகவில் எடப்பாடி பழனிசாமிக்கு எதிராக அதிருப்தி தெரிவித்து வரும் முன்னாள் அமைச்சர்கள் அணிக்குள் தற்போது கருத்து வேறுபாடு ஏற்பட்டுள்ளதா என்ற கேள்வி எழுந்துள்ளது. எஸ்.பி.வேலுமணி மற்றும் நத்தம் விஸ்வநாதன் ஆகியோர் வெளியிட்ட கூட்டறிக்கைக்கு மாறாக, முன்னாள் அமைச்சர் தங்கமணி அதிமுக சார்பில் நடைபெற்ற ஆர்ப்பாட்டத்தில் பங்கேற்றிருப்பதே இதற்கு காரணமாக அமைந்துள்ளது.

விவசாயிகளின் பயிர்க்கடனை முழுமையாக ரத்து செய்யாத தமிழக வெற்றிக் கழக அரசைக் கண்டித்தும், கர்நாடக அரசு மேகதாதுவில் அணை கட்ட முயற்சிப்பதைக் கண்டித்தும், தமிழகம் முழுவதும் மாவட்ட தலைநகரங்களில் ஆர்ப்பாட்டம் நடத்த அதிமுக பொதுச் செயலாளர் எடப்பாடி பழனிசாமி உத்தரவிட்டிருந்தார்.

இந்த ஆர்ப்பாட்டத்தில் முன்னாள் அமைச்சர்கள் தங்களது சொந்த மாவட்டங்களில் தலைமையேற்று பங்கேற்காமல், வேறு மாவட்டங்களுக்கு பொறுப்பு வழங்கப்பட்டிருந்தது. இதற்கு எஸ்.பி.வேலுமணி, நத்தம் விஸ்வநாதன் உள்ளிட்ட அதிருப்தி நிர்வாகிகள் கடும் எதிர்ப்பு தெரிவித்தனர்.

இதுதொடர்பாக அவர்கள் வெளியிட்ட கூட்டறிக்கையில், ஆர்ப்பாட்டத்துக்கு தங்களது முழு ஆதரவு இருப்பதாகவும், ஆனால் தங்களது சொந்த மாவட்டங்களைத் தவிர்த்து வேறு மாவட்டங்களில் சென்று ஆர்ப்பாட்டத்தை தலைமையேற்று நடத்த முடியாது என்றும் தெரிவித்திருந்தனர்.

மேலும், தங்களுக்கு ஏற்கனவே வழங்கப்பட்டிருந்த மாநில மற்றும் மாவட்டப் பொறுப்புகளை மீண்டும் வழங்க வேண்டும் என எடப்பாடி பழனிசாமியிடம் வலியுறுத்தியும் இதுவரை எந்த நடவடிக்கையும் எடுக்கப்படவில்லை என்றும் அவர்கள் குற்றம்சாட்டினர்.

இந்த நிலையில், இன்று தஞ்சாவூரில் எடப்பாடி பழனிசாமி தலைமையில் அதிமுக ஆர்ப்பாட்டம் நடைபெற்று வருகிறது. ஆனால், எஸ்.பி.வேலுமணி உள்ளிட்ட அதிருப்தி நிர்வாகிகள் இந்தப் போராட்டத்தில் பங்கேற்கவில்லை.

இதற்கிடையே, வேலுமணி அணியைச் சேர்ந்தவராகக் கருதப்படும் முன்னாள் அமைச்சர் பி.தங்கமணி, அந்த அணியின் நிலைப்பாட்டுக்கு மாறாக தருமபுரியில் நடைபெறும் அதிமுக ஆர்ப்பாட்டத்தில் பங்கேற்கச் சென்றுள்ளார்.

இதுதான் தற்போது அதிமுக அரசியலில் புதிய விவாதத்தை ஏற்படுத்தியுள்ளது. எடப்பாடி பழனிசாமிக்கு எதிராக ஒரே அணியாக செயல்பட்டு வந்ததாகக் கூறப்படும் வேலுமணி, நத்தம் விஸ்வநாதன் உள்ளிட்டோரின் அணியில் அனைவரும் ஒரே நிலைப்பாட்டில் இல்லையா என்ற கேள்வி எழுந்துள்ளது.

தங்கமணி ஆர்ப்பாட்டத்தில் பங்கேற்றிருப்பது, அவர் எடப்பாடி பழனிசாமியுடன் மீண்டும் இணக்கமான பாதையைத் தேர்வு செய்கிறாரா என்ற எதிர்பார்ப்பையும் உருவாக்கியுள்ளது. அதேவேளையில், இது தனிப்பட்ட முடிவாக இருக்கலாம் என்றும், அதிருப்தி அணியில் உடனடியாகப் பிளவு ஏற்பட்டுவிட்டதாக முடிவு செய்ய முடியாது என்றும் அரசியல் வட்டாரங்கள் கருதுகின்றன.

ஆனால், ஏற்கனவே அதிமுகவில் தலைமையைச் சுற்றி பல்வேறு அணிகள் உருவாகியுள்ள நிலையில், ஒரே அணியில் உள்ள முக்கிய நிர்வாகிகள் ஒவ்வொருவரும் வெவ்வேறு அரசியல் முடிவுகளை எடுக்கத் தொடங்குவது எடப்பாடி பழனிசாமிக்கு சாதகமாக அமையுமா என்ற கேள்வியும் எழுந்துள்ளது.

வேலுமணி தரப்பு தொடர்ந்து எடப்பாடிக்கு எதிராக தனி நிலைப்பாட்டைத் தொடருமா? தங்கமணியின் அடுத்தகட்ட அரசியல் நகர்வு என்ன? என்பதே தற்போது அதிமுக வட்டாரத்தில் பேசப்படும் முக்கிய கேள்விகளாக உள்ளன.