கர்நாடகாவில் சாதி, மதம் மற்றும் கௌரவம் என்ற பெயரால் நடத்தப்படும் ஆணவக் கொலைகளைத் தடுக்க, முதல்வர் சித்தராமையா தலைமையிலான அரசு புதிய தனிச்சட்டத்தைக் கொண்டுவரத் தீர்மானித்துள்ளது.

சட்டத்தின் முக்கிய அம்சங்கள்:

திருமண உரிமை: 18 வயது பெண்ணும், 21 வயது ஆணும் தங்களின் விருப்பப்படி மணம் முடிப்பதை எக்காரணம் கொண்டும் (சாதி, மதம், மொழி, வர்க்கம்) தடுக்க முடியாது.

குற்றமாகக் கருதப்படுபவை: தம்பதியைத் தாக்குதல், கொலை செய்தல், மிரட்டுதல் அல்லது குடும்பத்தை விட்டு ஒதுக்கி வைத்தல் ஆகியவை கடுமையான தண்டனைக்குரியவை.

உளவியல் சித்ரவதை: உயிருடன் இருக்கும் மகளுக்கோ, மகனுக்கோ இறுதிச் சடங்கு அல்லது திதி செய்வது போன்ற மனிதாபிமானமற்ற செயல்களும் இச்சட்டத்தின்படி குற்றமாகும்.

தண்டனை மற்றும் பாதுகாப்பு:

சிறைத்தண்டனை: குற்றவாளிகளுக்கு 5 முதல் 10 ஆண்டுகள் வரை சிறை தண்டனை விதிக்கப்படும்.

அபராதம்: ரூ. 1 லட்சம் முதல் ரூ. 3 லட்சம் வரை அபராதம் விதிக்கப்படும்.

அவசரப் பாதுகாப்பு: காதல் தம்பதிகள் பாதுகாப்பு கோரி புகார் அளித்த 6 மணி நேரத்திற்குள் மாவட்ட நிர்வாகம் அவர்களுக்கு உரிய பாதுகாப்பு வழங்க வேண்டும்.

சமூக நலத்துறை அமைச்சகம் தயாரித்துள்ள இந்த மசோதா, வரும் பட்ஜெட் கூட்டத்தொடரில் தாக்கல் செய்யப்பட உள்ளது. இதன் மூலம் காதல் தம்பதிகளின் உயிருக்கும், உரிமைக்கும் சட்டப்பூர்வப் பாதுகாப்பு உறுதி செய்யப்பட்டுள்ளது.