தமிழகத்தில் பக்ரீத் உள்ளிட்ட எந்த நாளாக இருந்தாலும் பசுக்கள் மற்றும் கன்றுகளை வதைக்க அனுமதி இல்லை என சென்னை உயர்நீதிமன்றம் பிறப்பித்த உத்தரவு பெரும் கவனத்தை ஈர்த்துள்ளது. மேலும், கால்நடை பாதுகாப்பு சட்டங்களை மாநிலம் முழுவதும் கடுமையாக அமல்படுத்த தமிழக அரசுக்கு நீதிமன்றம் தெளிவான அறிவுறுத்தலையும் வழங்கியுள்ளது.

கோவை மாவட்டத்தைச் சேர்ந்த இந்து மக்கள் கட்சி நிர்வாகி கே. சூர்யா பிரசாந்த் தாக்கல் செய்த பொதுநல மனுவை விசாரித்த சென்னை உயர்நீதிமன்றத்தின் விடுமுறைக்கால அமர்வு இந்த முக்கிய உத்தரவை பிறப்பித்தது.நீதிபதிகள் ஜி.ஆர். சுவாமிநாதன் மற்றும் வி. லட்சுமிநாராயணன் ஆகியோர் அடங்கிய அமர்வு, கடந்த மே 27-ஆம் தேதி இந்த வழக்கில் தீர்ப்பளித்தது.

பக்ரீத் பண்டிகை காலங்களில் பொது இடங்களில் தற்காலிகக் கொட்டகைகள் அமைத்து, பசுக்கள் சட்டவிரோதமாக வதைக்கப்படுவதாக மனுதாரர் தரப்பில் குற்றச்சாட்டு முன்வைக்கப்பட்டது.இந்த விவகாரத்தை விரிவாக ஆய்வு செய்த நீதிபதிகள், தற்காலிக இடங்களை வதைக்கூடங்களாக அறிவிக்கும் அதிகாரம் காவலர்களுக்கு இல்லை என்பதை சுட்டிக்காட்டினர்.

இந்த தடையை முழுமையாக உறுதி செய்ய தமிழக தலைமைச் செயலாளர் தேவையான நடவடிக்கைகளை மேற்கொள்ள வேண்டும் என்றும் நீதிமன்றம் உத்தரவிட்டுள்ளது.சட்ட விதிகளின்படி, விலங்குகளை வதைக்கும் நடவடிக்கைகள் உள்ளாட்சி அமைப்புகளால் அங்கீகரிக்கப்பட்டு, உரிய அனுமதி மற்றும் உரிமம் பெற்ற இறைச்சிக் கூடங்களில் மட்டுமே மேற்கொள்ளப்பட வேண்டும் என நீதிமன்றம் திட்டவட்டமாக தெரிவித்துள்ளது.

விதிமுறைகளை மீறும் எந்த நடவடிக்கையும் சட்டப்படி கடுமையாக எதிர்கொள்ளப்படும் எனவும் நீதிமன்றம் தெளிவுபடுத்தியுள்ளது.மேலும், பக்ரீத் பண்டிகையின் போது பசுக்களை மட்டுமே பலியிடுவது இஸ்லாமிய மதக் கோட்பாட்டின் கட்டாய அம்சம் அல்ல என்றும் நீதிமன்றம் குறிப்பிட்டுள்ளது.

பிற விலங்குகளையும் பலியிடும் நடைமுறை இருப்பதால், இதனை மத சுதந்திரம் என்ற அடிப்படையில் மட்டுமே பார்க்க முடியாது என்பதையும் நீதிமன்றம் சுட்டிக்காட்டியுள்ளது.இந்த உத்தரவுக்கு எதிராக தமிழக அரசு உச்சநீதிமன்றத்தில் மேல்முறையீடு செய்துள்ளது. இந்த வழக்கு தற்போது சட்ட மற்றும் அரசியல் வட்டாரங்களில் பரவலான விவாதத்தை ஏற்படுத்தியுள்ளது.