மகாராஷ்டிர மாநிலம் பீட் மாவட்டத்தில் உள்ள தஹிபாலே குடும்பத்தில், சுமார் 200 ஆண்டுகள் மற்றும் நான்கு தலைமுறைகளுக்குப் பிறகு முதன்முறையாக ஒரு பெண் குழந்தை பிறந்துள்ள வரலாற்றுச் சிறப்புமிக்க சம்பவம் நிகழ்ந்துள்ளது. நீண்டகாலக் காத்திருப்புக்குப் பிறகு குடும்பத்தின் வம்சாவளியில் பிறந்த அந்தப் பெண் குழந்தைக்குக் குடும்பத்தினர் ‘கார்கி’ என அன்புடன் பெயரிட்டுள்ளனர்.

மருத்துவமனையில் பிரசவம் முடிந்து வீடு திரும்பிய தாயையும் சேயையும் குடும்பத்தினர் விவரிக்க முடியாத உற்சாகத்துடன் வரவேற்றனர். மேளதாளங்கள் அதிர, கிராமிய நடனக் கலைஞர்களின் கலைநிகழ்ச்சிகளுடன், வண்ண மலர்களால் அலங்கரிக்கப்பட்ட சாரட் வண்டியில் தாயையும் குழந்தையையும் அமரவைத்து ஊர்வலமாக வீட்டிற்கு அழைத்து வந்தனர். இந்தக் கொண்டாட்டம் அந்த கிராம மக்கள் அனைவரையும் வியப்பிலும் மகிழ்ச்சியிலும் ஆழ்த்தியது.

குழந்தையின் தாத்தா லிம்பாஜி தஹிபாலே உணர்ச்சிவசப்பட்டு கூறுகையில், "எங்கள் குடும்பத்தில் ஒரு பெண் குழந்தை பிறப்பது மிகப்பெரிய பாக்கியம். தலைமுறை தலைமுறையாக இருந்துவந்த பெரிய குறை இன்று தீர்ந்துள்ளது" என்றார். மேலும், தனது மருமகள்களைச் சொந்த மகள்களைப் போல அரவணைத்து வந்ததாகவும், தற்போது பேத்தியை ராஜமரியாதையுடன் சாரட் வண்டியில் அழைத்து வந்தது மட்டற்ற மகிழ்ச்சி அளிப்பதாகவும் தெரிவித்தார். பாட்டி சுரேகா, தங்கள் வீட்டிற்கு லக்ஷ்மியே நேரில் வந்துவிட்டதாகப் பூரிப்படைந்தார்.

குழந்தையின் தந்தை பேசுகையில், "சமூகத்தில் பலர் இன்னமும் ஆண் குழந்தையையே விரும்பும் சூழலில், பெண் குழந்தையைப் பெறுவதிலுள்ள உணர்வும் மகிழ்ச்சியும் முற்றிலும் வேறுபட்டது, தனித்துவமானது. மகள்கள் எப்போதும் தந்தையிடம் அளவற்ற பாசம் கொண்டவர்கள்; என் மகளைக் கண் இமை போல மலரைப் போற்றி வளர்ப்போம்" எனக் குறிப்பிட்டார்.

இப்பகுதியைச் சேர்ந்த சமூக ஆர்வலர் அனந்த் இங்லே இக்குடும்பத்தினரின் செயலைப் பெரிதும் பாராட்டியுள்ளார். சமூகத்தில் சில பிரிவினரிடையே இன்றும் பெண் குழந்தைகள் குறித்த குறுகிய மனப்பான்மை நிலவி வரும் சூழலில், கார்கியின் பிறப்பைத் திருவிழா போலக் கொண்டாடியதன் மூலம் தஹிபாலே குடும்பம் சமூகத்திற்கு ஒரு மிகச்சிறந்த நேர்மறையான மற்றும் வலுவான விழிப்புணர்வுச் செய்தியை அளித்துள்ளதாகப் போற்றினார்.