மற்ற எந்த மரங்களையும் விட பலவிதமான பயன்களை மனித சமுதாயத்துக்கும் இயற்கைக்கும் வழங்கும் அற்புத மரமாக பனை மரம் விளங்குகிறது. “ஒரு பனை மரம் இருந்தால் அதைச் சுற்றி ஒரு சிறிய இயற்கை உலகமே உருவாகும்” என்று உயிரியல் ஆய்வாளர்கள் கூறுவது இதற்குக் காரணம்.

பனை மரத்தின் நிழல், இலை, பழம் போன்றவற்றை நம்பி பல சிறு உயிரினங்களும் பறவைகளும் தங்கள் வாழ்வை அமைத்துக்கொள்கின்றன.இவ்வளவு உயிர்களுக்கு ஆதரவாக இருக்கும் பனை மரம், கோடைக்காலத்தில் மனிதர்களுக்கும் ஒரு இயற்கை வரமாக நுங்கை அளிக்கிறது.

பொதுவாக ஜனவரி முதல் ஜூன் மாதம் வரை சந்தைகளில் கிடைக்கும் நுங்கு, கடும் வெயிலில் தாகத்தையும் உடல் சூட்டையும் குறைக்கும் இயற்கை குளிர்பானமாக கருதப்படுகிறது. வெயிலின் தாக்கத்தில் சோர்வடைந்த உடலுக்கு புத்துணர்ச்சி அளித்து உடல் வெப்பத்தை சமநிலைப்படுத்தும் சக்தி இதற்கு உள்ளது.

நுங்கு ஒரு சுவையான பழம் மட்டுமல்ல; அது சத்துக்கள் நிறைந்த ஆரோக்கிய பொக்கிஷம். இதில் உடலுக்கு சக்தி தரும் வைட்டமின் பி, நோய் எதிர்ப்பு சக்தியை அதிகரிக்கும் வைட்டமின் சி, மேலும் இரும்பு, கால்சியம், துத்தநாகம், பொட்டாசியம், கார்போஹைட்ரேட் மற்றும் புரதம் போன்ற பல முக்கிய ஊட்டச்சத்துகள் நிறைந்துள்ளன.

இச்சத்துக்கள் கோடைக்கால வெப்பத்தால் ஏற்படும் சோர்வு, நீரிழப்பு போன்ற பிரச்சனைகளை குறைத்து உடலை புத்துணர்ச்சியுடன் வைத்திருக்க உதவுகின்றன.கோடை காலத்தில் குழந்தைகளுக்கு ஏற்படும் அம்மை போன்ற நோய்களைத் தடுப்பதிலும் நுங்கு முக்கிய பங்கு வகிக்கிறது என பாரம்பரிய மருத்துவ நம்பிக்கைகள் தெரிவிக்கின்றனர்.

அதேபோல், உடல் வெப்பம் அதிகரிப்பதால் குடலில் ஏற்படும் வறட்சியை தணித்து செரிமானத்தை சீராக்கி மலச்சிக்கலை குறைக்கும் திறனும் நுங்குக்கு உண்டு.மேலும், கடும் வெயிலால் தோலில் ஏற்படும் கொப்புளங்கள் மற்றும் சில தோல் பிரச்சனைகளைத் தடுக்கவும் நுங்கை அவ்வப்போது உணவில் சேர்த்துக்கொள்ளலாம்.

ஆராய்ச்சிகள் தெரிவிப்பதாவது, நுங்கில் உள்ள அந்தோசியானின் (Anthocyanin) என்ற இயற்கை வேதிப்பொருள் மார்பகப் புற்றுநோய் உருவாகும் அபாயத்தை குறைக்க உதவக்கூடும் என்பதாகும்.இதனால் தான், கோடைக்காலத்தில் உடலை குளிர்ச்சியாகவும் ஆரோக்கியமாகவும் காக்கும் இயற்கையின் இனிய பரிசாக நுங்கு கருதப்படுகிறது.