தமிழ் சினிமாவின் முன்னணி நடிகர்களில் ஒருவரான ஜெயம் ரவி தனது பெயரை சட்டப்படி ரவி மோகன் என்று மாற்றிக் கொண்டிருப்பது தெரிந்த விஷயம். தற்போது அவரது தனிப்பட்ட வாழ்க்கையிலும், திரைத்துறையிலும் பிரச்சனைகள் சூழ்ந்துள்ளன. குறிப்பாக ஒரு திரைப்பட ஒப்பந்த பிரச்சனை நீதிமன்றம் வரை சென்று, தற்போது அவரது சொத்துகள் முடக்கம் செய்யப்பட உள்ளன என்பது அதிர்ச்சியை ஏற்படுத்தியுள்ளது.

வழக்கின் பின்னணி
சென்னை பாபி டச் கோல்டு யுனிவர்சல் என்ற தயாரிப்பு நிறுவனம், தாங்கள் தயாரிக்க திட்டமிட்ட படத்தில் நடிக்க ரவி மோகன் ரூ.6 கோடி அட்வான்ஸ் பெற்றதாக குற்றம் சாட்டியது. ஆனால் படம் தொடங்கப்படவில்லை. எனவே அந்த பணத்தை திருப்பித் தர வேண்டும் என்று நுகர்வோர் நீதிமன்றத்தில் வழக்கு தொடரப்பட்டது.

மறுபுறம், ஜெயம் ரவி தரப்பில், தயாரிப்பு நிறுவனம் கால்ஷீட் எடுத்தும், நேரத்தில் படப்பிடிப்பு தொடங்காததால் தான் பாதிக்கப்பட்டதாக கூறி, ரூ.9 கோடி இழப்பீடு கோரி சென்னை உயர் நீதிமன்றத்தில் வழக்கு தொடரப்பட்டது.

நீதிமன்ற தீர்ப்புகள்

ஜெயம் ரவியின் இழப்பீட்டு வழக்கை சென்னை உயர் நீதிமன்றம் தள்ளுபடி செய்தது.பாபி டச் கோல்டு நிறுவனத்திடம் பெற்ற ரூ.6 கோடி தொகைக்கு உத்தரவாதம் அளிக்க வேண்டும் என்று நீதிமன்றம் உத்தரவிட்டது.அந்த உத்தரவை 4 வாரங்களில் நிறைவேற்ற வேண்டும் என்றும், அதற்கான கடைசி தேதி ஆகஸ்ட் 20 என்று நிர்ணயிக்கப்பட்டது.ஆனால் ரவி மோகன் அந்த உத்தரவினை பின்பற்றாததால், பாபி டச் கோல்டு நிறுவனம் மீண்டும் நீதிமன்றத்தில் மனு தாக்கல் செய்தது.

சொத்துகள் முடக்கம் செய்ய அனுமதி
ஜெயம் ரவி உத்தரவாதம் தராத நிலையில், அவரது சொத்துகளை முடக்கம் செய்ய வேண்டும் என்று தயாரிப்பு நிறுவனம் கோரிய மனுவுக்கு நீதிமன்றம் அனுமதி வழங்கியுள்ளது. இதனால் தயாரிப்பு நிறுவனம், ஜெயம் ரவியின் சொத்துகளை முடக்க நடவடிக்கை எடுக்க வழி வகுக்கப்பட்டுள்ளது.

இந்த வழக்கு அடுத்த கட்ட விசாரணைக்கு செல்லும் நிலையில், இது ஜெயம் ரவிக்கு பெரிய பின்னடைவை ஏற்படுத்தக்கூடும் என கூறப்படுகிறது. திரைத்துறையிலும், தனிப்பட்ட வாழ்விலும் நெருக்கடிகளை சந்தித்து வரும் ஜெயம் ரவிக்கு, இந்த வழக்கு மேலும் சிக்கலை ஏற்படுத்தியுள்ளது.