தமிழ் சினிமாவின் முன்னணி தயாரிப்பாளரும், நடிகர்கள் ஜீவா மற்றும் ஜித்தன் ரமேஷின் தந்தையுமான ஆர்.பி. சௌத்ரி சமீபத்தில் நிகழ்ந்த சாலை விபத்தில் உயிரிழந்தது திரையுலகையே சோகத்தில் ஆழ்த்தியுள்ளது. அவரது மறைவுக்கு பல்வேறு திரைத்துறை பிரபலங்கள் நேரில் அஞ்சலி செலுத்திய நிலையில், இன்று அவரது உடல் இறுதிச்சடங்குகளுடன் தகனம் செய்யப்பட்டது.

சூப்பர் குட் ஃபிலிம்ஸ் நிறுவனத்தின் மூலம் தமிழ் சினிமாவுக்கு பல வெற்றிப் படங்களை வழங்கியவர் ஆர்.பி. சௌத்ரி. ஆரம்பத்தில் “சூப்பர் இன்டர்நேஷனல்” என்ற பெயரில் தயாரிப்பு நிறுவனத்தை நடத்தி வந்த அவர், பின்னர் குட் நைட் மோகனுடன் இணைந்து “சூப்பர் குட் ஃபிலிம்ஸ்” என்ற பெயரில் தொடர்ந்து திரைப்படங்களை தயாரித்தார்.

மலையாளத்தில் தொடங்கிய அவரது தயாரிப்பு பயணம், பின்னர் தமிழில் மிகப்பெரிய வெற்றிகளை கண்டது. ‘நாட்டாமை’, ‘சூர்யவம்சம்’, ‘சேரன் பாண்டியன்’, ‘பூவே உனக்காக’, ‘துள்ளாத மனமும் துள்ளும்’, ‘தித்திக்குதே’ போன்ற பல வெற்றிப் படங்கள் அவரது தயாரிப்பில் வெளியாகின.

இதுவரை 99 படங்களை தயாரித்துள்ள அவர், தனது 100வது படத்தை சிறப்பாக உருவாக்க வேண்டும் என்ற எண்ணத்தில் இருந்ததாக கூறப்படுகிறது. அதற்காக நடிகர் விஜய்யுடன் பேச்சுவார்த்தைகளும் நடைபெற்றதாக தகவல்கள் வெளியாகியிருந்தன.

சில நாட்களுக்கு முன்பு ராஜஸ்தானில் உறவினர் திருமணத்தில் கலந்துகொள்ளச் சென்றிருந்த ஆர்.பி. சௌத்ரி, அங்கிருந்து திரும்பும் வழியில் சாலை விபத்தில் சிக்கினார். தகவல்படி, விபத்தின் அதிர்ச்சியால் ஏற்பட்ட மாரடைப்பே அவரது உயிரிழப்புக்கு காரணமாக இருந்ததாக கூறப்படுகிறது.

அவரது மறைவு செய்தி வெளியானதும், நடிகர்கள் விஜய், ரஜினிகாந்த் உள்ளிட்ட பலர் நேரில் சென்று அஞ்சலி செலுத்தினர்.

இந்த நிலையில், இயக்குநரும் நடிகருமான தம்பி ராமைய்யா, சௌத்ரியின் உடலுக்கு அஞ்சலி செலுத்திய பின் செய்தியாளர்களிடம் உணர்ச்சிவசப்பட்டு பேசினார்.

அவர் கூறுகையில்,
"ஜீவாவை எப்போதும் சிரித்த முகத்தில்தான் பார்த்திருக்கிறோம். அவரை இப்படி அழுகும் நிலையில் பார்க்க மிகவும் வேதனையாக இருக்கிறது. தனது மகன் ஒரு பெரிய பாக்ஸ் ஆபிஸ் ஹிட் கொடுக்க வேண்டும் என்று சௌத்ரி விரும்பியிருந்தார். சமீபத்தில் கிடைத்த அந்த வெற்றி அவருக்கு ஒரு மனநிம்மதியை கொடுத்தது. தனது மகன் நீண்ட காலம் கழித்து வெற்றி பெற்றதை பார்த்து மகிழ்ந்தார்." என்றார்.

மேலும்,
"சௌத்ரியும் அவரது மனைவியும் எப்போதும் ஒன்றாகவே இருந்தார்கள். இந்த இழப்பை ஜீவாவின் அம்மா எப்படி சமாளிப்பார்கள் என்று தெரியவில்லை. ஆனால் சௌத்ரியின் ஆன்மா மேலிருந்து தனது மகன்களை ஆசீர்வதித்துக்கொண்டே இருக்கும். சினிமா இருக்கும் வரை ஆர்.பி. சௌத்ரியின் பெயர் வாழும்" என உருக்கமாக தெரிவித்தார்.

தம்பி ராமைய்யா பேசியபோது அவரது கண்களில் நீர் தெரிந்தது. அவரது வார்த்தைகள் அங்கிருந்தவர்களையும் நெகிழ்ச்சியடைய வைத்தன. ஆர்.பி. சௌத்ரியின் மறைவு தமிழ் சினிமாவுக்கு பெரிய இழப்பாகவே பார்க்கப்படுகிறது.