மேற்கு ஆசியாவில் இஸ்ரேல்-அமெரிக்கா மற்றும் ஈரான் இடையிலான போர் 14-வது நாளை எட்டியுள்ள சூழலில், உலக நாடுகளை அச்சுறுத்தி வரும் ஹார்முஸ் ஜலசந்தி (Strait of Hormuz) முடக்கத்திலிருந்து இந்தியாவிற்கு மட்டும் ஒரு முக்கிய விலக்கு அளிக்கப்பட்டுள்ளது.

ஈரான் தூதரின் உறுதிமொழி:
"இந்தியாவும் ஈரானும் பிரிக்க முடியாத நண்பர்கள்; உங்கள் துன்பம் எங்களது" என்று நெகிழ்ச்சியுடன் குறிப்பிட்ட இந்தியாவுக்கான ஈரான் தூதர் முகமது ஃபத்தாலி, ஹார்முஸ் ஜலசந்தி வழியாகச் செல்லும் இந்தியக் கப்பல்களுக்குப் பாதுகாப்பான வழித்தடம் வழங்கப்படும் என அதிகாரப்பூர்வமாக அறிவித்துள்ளார். ஈரானின் உயர்மட்டத் தலைமை இதற்கான நேரடி உத்தரவை வழங்கியுள்ளதாகவும் அவர் தெரிவித்தார்.

இந்தியாவின் ராஜதந்திர வெற்றி:
இந்தத் திருப்பத்திற்குப் பின்னால் மத்திய வெளியுறவுத் துறை அமைச்சர் எஸ். ஜெய்சங்கரின் தீவிர ராஜதந்திர முயற்சி உள்ளது:

அவசர ஆலோசனை: ஈரானிய வெளியுறவு அமைச்சர் அப்பாஸ் அரக்ச்சியுடன் ஜெய்சங்கர் நடத்திய தொலைபேசி உரையாடலில், இந்தியாவின் 80% எரிபொருள் தேவை இறக்குமதியைச் சார்ந்திருப்பதை அழுத்தமாக எடுத்துரைத்தார்.

பொருளாதாரப் பாதுகாப்பு: ஹார்முஸ் ஜலசந்தி முடக்கப்பட்டால் இந்தியப் பொருளாதாரம் நிலைகுலையும் என்ற யதார்த்தத்தை ஈரான் ஏற்றுக்கொண்டு, இந்தியக் கப்பல்களுக்கு மட்டும் விசேஷ அனுமதி வழங்கியுள்ளது.

"ஹார்முஸ் நீரிணையை முழுமையாக மூட நாங்கள் ஒருபோதும் விரும்பியதில்லை" என அப்துல் மஜித் ஹக்கீம் இலாஹி (ஈரான் உச்சத் தலைவரின் பிரதிநிதி).

சர்வதேச அளவில் மற்ற நாடுகளின் எண்ணெய் கப்பல்கள் மீது தாக்குதல் எச்சரிக்கை நிலவும் வேளையில், இந்தியாவுக்குக் கிடைத்துள்ள இந்த 'தனி வழித்தடம்' உலக அரசியலில் இந்தியாவின் செல்வாக்கை மீண்டும் ஒருமுறை நிலைநாட்டியுள்ளது.