கையில் கைப்பேசி, விரல் நுனியில் இணையவசதி எனத் தொழில்நுட்பம் வாழ்க்கையின் ஓர் அங்கமாகிவிட்ட இன்றைய சூழலில், குழந்தைகளின் இணையவழிப் பாதுகாப்பு பெரும் கேள்விக்குறியாகியுள்ளது. கல்வி, பொழுதுபோக்கு, தகவல் பரிமாற்றம் எனப் பல வகைகளில் இணையத்தைப் பயன்படுத்தும் சிறுவர்கள், அதே வழியாகப் பாலியல் சுரண்டல் மற்றும் மிரட்டல்களுக்கும் இலக்காகி வருவது அதிர்ச்சியை ஏற்படுத்தியுள்ளது. இதனை வெளிப்படுத்தும் வகையில், பாகிஸ்தானில் குழந்தைகள் எதிர்கொள்ளும் இணையவழிப் பாதிப்புகள் குறித்த ஆய்வு முடிவுகள் வெளியாகியுள்ளன.

ஐக்கிய நாடுகள் குழந்தைகள் நிதியமும், சர்வதேச குற்றவியல் காவல் அமைப்பும் இணைந்து நடத்திய ஆய்வின்படி, பாகிஸ்தானில் கடந்த ஓராண்டில் மட்டும் 12 முதல் 17 வயதுக்குட்பட்ட சுமார் 15 லட்சம் குழந்தைகள் இணையதளம் வாயிலாகப் பாலியல் சுரண்டல் மற்றும் அச்சுறுத்தல்களுக்கு ஆளாகியுள்ளனர்.குழந்தைகள் இணையத்தைப் பயன்படுத்தும் சூழலில் அவர்களின் பாதுகாப்பை உறுதிப்படுத்த வேண்டியதன் அவசியத்தை இந்தப் புள்ளிவிவரங்கள் உணர்த்துகின்றன.

இந்த ஆய்வில் இடம்பெற்ற சம்பவங்களில் 85 சதவீத வழக்குகளில், பாதிக்கப்பட்ட குழந்தைகளுக்கு ஏற்கெனவே தெரிந்தவர்களே அவர்களைச் சுரண்டியிருப்பது தெரியவந்துள்ளது. அறிமுகமானவர்களை நம்பும் குழந்தைகள், அவர்களாலேயே பாதிப்புக்கு உள்ளாகும் நிலை பெரும் கவலையை ஏற்படுத்தியுள்ளது.

மேலும், மொத்தப் பாதிப்புகளில் 44 சதவீதம் சமூக வலைதளங்கள் வாயிலாக நிகழ்ந்துள்ளன. குழந்தைகள் இணையத்தில் புதிய நபர்களுடன் பழகும்போதும், தங்களின் தனிப்பட்ட விவரங்கள் மற்றும் புகைப்படங்களைப் பகிரும்போதும் எச்சரிக்கையுடன் இருக்க வேண்டியதன் அவசியத்தை இந்த ஆய்வு வலியுறுத்துகிறது.இணையவழிப் பாலியல் சுரண்டலுக்கு ஆளான குழந்தைகளில் பாதிக்கும் மேற்பட்டோர், அவமானம் மற்றும் அச்சம் காரணமாகத் தங்களுக்கு நேர்ந்த கொடுமைகளை வெளியில் தெரிவிக்காமல் மறைத்துவிட்டதாக ஆய்வில் தெரியவந்துள்ளது.

இதனால், பல சம்பவங்கள் உரியவர்களின் கவனத்துக்கு வராமல் போகும் அபாயம் உள்ளது. குழந்தைகள் தங்களுக்கு ஏற்படும் பாதிப்புகளைத் தயக்கமின்றிப் பெற்றோர், ஆசிரியர்கள் அல்லது நம்பிக்கைக்குரிய பெரியவர்களிடம் தெரிவிக்கும் வகையில் பாதுகாப்பான சூழலை உருவாக்குவது அவசியமாகிறது.

இணையத்தைப் பாதுகாப்பாகப் பயன்படுத்துவது குறித்த விழிப்புணர்வைச் சிறுவயதிலிருந்தே ஏற்படுத்துவதுடன், இணையவழி அச்சுறுத்தல்களை எதிர்கொள்ளும் குழந்தைகளுக்கு உடனடி உதவியும் ஆதரவும் கிடைப்பதை உறுதிசெய்ய வேண்டும் என்பதையே இந்த ஆய்வு முடிவுகள் வலியுறுத்துகின்றன.