இந்திய பிரதமர் நரேந்திர மோடி நான்கு நாள் வெளிநாட்டு பயணமாக ஜப்பான் மற்றும் சீனா செல்கிறார். இதில் ஜப்பானில் நடைபெறும் இந்தியா–ஜப்பான் 15ஆவது வருடாந்திர உச்சிமாநாட்டில் கலந்து கொண்டு, ஜப்பான் பிரதமருடன் முக்கிய பேச்சுவார்த்தை நடத்துகிறார்.

இதே நேரத்தில், அமெரிக்காவுடனான வர்த்தக ஒப்பந்தத்தை முன்னேற்ற ஜப்பான் தனது வர்த்தக பேச்சுவார்த்தையாளர் ரியோசெய் அகாசவாவை இன்று அமெரிக்கா அனுப்ப திட்டமிட்டிருந்தது. ஆனால், அந்தப் பயணம் திடீரென ரத்து செய்யப்பட்டது.

அமெரிக்கா விதித்துள்ள கூடுதல் வரிகளிலிருந்து தப்பிக்க, ஜப்பான் 550 பில்லியன் டாலர் அளவிலான முதலீட்டை அமெரிக்காவில் செய்ய சம்மதித்துள்ளது. இந்த முதலீட்டின் மூலம் கிடைக்கும் வருவாயை எவ்வாறு பிரிப்பது என்பது குறித்து இறுதி முடிவை எடுக்க அகாசவா அமெரிக்கா செல்ல இருந்தார்.

ஆனால், அமெரிக்க தரப்புடன் ஒருங்கிணைக்கும் போது சில முக்கியமான நிர்வாக மட்ட விவாதங்கள் முதலில் தீர்க்கப்பட வேண்டும் என்பதும் தெரியவந்தது. இதனால், பயணம் தற்காலிகமாக ரத்து செய்யப்பட்டதாக ஜப்பான் அரசின் செய்தித் தொடர்பாளர் அறிவித்தார்.

மோடியின் ஜப்பான் பயணம் மற்றும் ஜப்பான்–அமெரிக்க வர்த்தக பேச்சுவார்த்தை ரத்து ஆகிய இரண்டும் ஒரே காலகட்டத்தில் நடந்துள்ளதால், சர்வதேச வட்டாரங்கள் இதை கூர்ந்து கவனித்து வருகின்றன.