அமெரிக்க முன்னள் துணை அதிபர் டிக் செனி 84 வயதில் காலமானார். அமெரிக்க நேரப்படி திங்கட்கிழமை இரவு நிமோனியா மற்றும் இதயம் தொடர்பான பிரச்சினையால் அவர் மரணமடைந்ததாக அவரது குடும்பத்தினர் தெரிவித்துள்ளனர். ஏற்கனவே 05 முறை அவருக்கு மாரடைப்பு ஏற்பட்டு சிகிச்சைக்கு பிறகு குணமடைந்தவர்.

குடியரசு கட்சியைச் சேர்ந்த இவர், ஜார்ஜ் எச் டபிள்யு புஷ் அதிபராக இருந்த போது 1989 முதல் 1993 வரை அமெரிக்க பாதுகாப்புத்துறை அமைச்சராக பதவி வகித்துள்ளார். இந்த காலகட்டத்தில் தான் ஈராக் மீது அமெரிக்கா போர் தொடுத்தது. இதன் பிறகு, ஜார்ஜ் எச் டபிள்யு புஷ் மகன் ஜார்ஜ் புஷ் அதிபராக இருந்த போது 2001 முதல் 2009-ஆம் ஆண்டு வரை துணை அதிபராக பதவி வகித்துள்ளார். அத்துடன்,  தலைமை நிர்வாக அதிகாரி போல் செயல்பட்டதுடன், பல முக்கிய முடிவுகளையும் எடுத்தவர்.

மேலும் அமெரிக்காவில் நடந்த இரட்டைக் கோபுர தாக்குதல் சம்பவத்துக்கு பிறகு பாதுகாப்பு மற்றும் வெளியுறவுக் கொள்கையில் முக்கிய பங்காற்றியுள்ளார். குடியரசு கட்சியை சேர்ந்தவராக இருந்தாலும், தற்போதைய அதிபர் டிரம்பை கடுமையாக விமர்சித்து வந்தவர்.

இவர் பிரபல டிவி ஒன்றுக்கு அளித்த பேட்டி ஒன்றில், 246 ஆண்டு கால வரலாற்றில் நமது குடியரசுக்கு டிரம்ப்பை போன்று பெரிய அச்சுறுத்தலாக யாரும் இருந்தது இல்லை என்றும், வாக்காளர்கள் நிராகரித்த பிறகும், அதிகாரத்தில் இருக்க வேண்டும் என்பதற்காக கடந்த தேர்தல் முடிவுகளை பொய் மற்றும் வன்முறை மூலம் திருட முயன்றார் என கடுமையாக விமர்சித்துள்ளார்.

அத்துடன், கடந்த அமெரிக்க அதிபர் தேர்தலில், ஜனநாயக கட்சியின் கமலா ஹாரீசுக்கு ஓட்டுப் போட்டதாக பகிரங்கமாக அறிவித்தார். முன்னாள் துணை ஜனாதிபதி டிக் செனி மறைவுக்கு அமெரிக்க அரசியல் தலைவர் மற்றும் பொதுமக்கள் பலர் இரங்கல் தெரிவித்து வருகின்றனர்.