காற்றழுத்த தாழ்வு பகுதி தற்போது வடமேற்கு திசையில் நகர்ந்து காற்றழுத்த தாழ்வு மண்டலமாக வலுப்பெற்றுள்ளது.இது வடமேற்கு மற்றும் அதனை ஒட்டிய மத்திய மேற்கு வங்கக்கடல் பகுதிகளில்,நேற்று (19-ந்தேதி) அதிகாலை வடக்கு ஆந்திரா மற்றும் தெற்கு ஒடிசா கடற்கரை பகுதிகளில் கரையை கடந்தது.

இதனிடையே,தென்னிந்திய பகுதிகளின் மேல் ஒரு வளிமண்டல மேலடுக்கு சுழற்சி தற்போது நிலவுகிறது. அதேபோல் வடக்கு கேரளா  -  தெற்கு குஜராத் பகுதிகளுக்கு அப்பால் தென்கிழக்கு  -  வடகிழக்கு அரபிக்கடல் பகுதிகளில் ஒரு காற்றழுத்த தாழ்வு நிலை நிலவுகிறது.

இதனால்,  6 தினங்களுக்கு அதாவது இன்று (20-ந்தேதி) முதல் வரும் 25-ந்தேதி வரையில், தமிழகத்தில் ஓரிரு இடங்களிலும், புதுச்சேரி மற்றும் காரைக்கால் பகுதிகளில் இடி மற்றும் மின்னலுடன் கூடிய லேசானது முதல் மிதமான மழை பெய்ய வாய்ப்புள்ளது.

அதுமட்டுமின்றி,ஓரிரு இடங்களில் பலத்த தரைக்காற்று வீசக்கூடும்.இதில் வருகிற 3-ந்தேதி வரையில் தென்மேற்கு அரபிக்கடல், மத்திய வங்கக்கடல், வடக்கு வங்கக்கடல் பகுதிகளில் மணிக்கு 60 கி.மீ வேகத்தில் சூறாவளிக் காற்று வீசும் என்பதால் அப்பகுதிக்கு மீனவர்கள் யாரும் செல்ல வேண்டாம் என்று அறிவுறுத்தப்படுகிறது.

இதில் நேற்று காலை 8 மணி நிலவரப்படி கடந்த 24 மணி நேரத்தில், நீலகிரி மாவட்டம் அவலாஞ்சியில் அதிகபட்சமாக 9 செ. மீ, நடுவட்டம், பந்தலூர் பகுதிகளில் 8 செ.மீ மழையும் பதிவாகியுள்ளது" என்று சென்னை வானிலை ஆய்வு மையம் தெரிவித்துள்ளது.