சென்னை ஐஐடி இணையதளத்தின் ஒரு பகுதி அண்மையில் செயலிழந்த சம்பவம் கல்வி மற்றும் தகவல் தொழில்நுட்ப வட்டாரங்களில் பெரும் கவனத்தை ஈர்த்துள்ளது. இணையதளத்தில் ஊடுருவியதாக கூறப்படும் மர்ம நபர் வெளியிட்ட தகவல், சைபர் பாதுகாப்பு மற்றும் மாணவர் சேர்க்கை நடைமுறைகள் குறித்து புதிய விவாதத்தை ஏற்படுத்தியுள்ளது.சென்னை ஐஐடி மற்றும் கான்பூர் ஐஐடி இணைந்து, 2026–27 கல்வியாண்டு முதல் நாட்டிலேயே முதன்முறையாக செயல்முறை அடிப்படையிலான இளநிலை சைபர் பாதுகாப்பு (BCyber) பட்டப்படிப்பை அறிமுகப்படுத்தியுள்ளன.

நாட்டில் வேகமாக அதிகரித்து வரும் சைபர் பாதுகாப்பு நிபுணர்களின் தேவையை பூர்த்தி செய்யும் நோக்கில் இந்த புதிய படிப்பு தொடங்கப்பட்டுள்ளது.இந்தப் படிப்புக்கு விண்ணப்பித்த ஒருவர், இறுதித் தேர்வுப் பட்டியலில் தனது பெயர் இடம்பெறாததால் அதிருப்தியடைந்ததாக தெரிவிக்கப்படுகிறது.

தனது திறமையை வெளிப்படுத்தவும், மாணவர் சேர்க்கை நடைமுறை குறித்து நிர்வாகத்தின் கவனத்தை ஈர்க்கவும் முயன்றதாக கூறி, சென்னை ஐஐடியின் மாணவர்கள் மற்றும் ஊழியர்களுக்கான இணைய சேவை தளத்தில் ஊடுருவி அதை தற்காலிகமாக செயலிழக்கச் செய்ததாக தகவல்கள் வெளியாகியுள்ளன.இணையதளத்தில் தோன்றியதாக கூறப்படும் செய்தியில், "எனது நோக்கம் எந்தவித சேதத்தையும் ஏற்படுத்துவது அல்ல. எனக்குத் தேவை நியாயமான ஒரு வாய்ப்பு மட்டுமே" என்று அந்த நபர் குறிப்பிட்டிருந்ததாக தெரிவிக்கப்படுகிறது.

இந்தச் செய்தியின் திரைப்பிடிப்பு சமூக வலைதளங்களிலும், குறிப்பாக ரெட்டிட் தளத்திலும் வேகமாக பரவியுள்ளது.அந்த பதிவில், சென்னை ஐஐடி வழங்கும் சைபர் பாதுகாப்பு இளநிலைப் பட்டப்படிப்புக்கு விண்ணப்பக் கட்டணத்தை செலுத்தி, தேவையான அனைத்து ஆவணங்களையும் சமர்ப்பித்ததுடன், தனது சைபர் பாதுகாப்பு தொடர்பான திட்டங்கள் மற்றும் திறமைகளையும் ஆதாரங்களுடன் வழங்கியிருந்தும், தேர்வுக்கு பரிசீலிக்கப்படவில்லை என்று அவர் குற்றம்சாட்டியதாக தெரிவிக்கப்படுகிறது.

மேலும், சென்னை ஐஐடி மற்றும் கான்பூர் ஐஐடியின் நிர்வாக சேவையகங்கள், தரவுத்தளங்கள், கட்டண பரிவர்த்தனை அமைப்புகள் மற்றும் விண்ணப்பதாரர்களின் தகவல்களை அணுக முடிந்ததாகவும் அவர் கூறியதாக தகவல்கள் வெளியாகியுள்ளன. இருப்பினும், இந்தக் கூற்றுகளின் உண்மைத்தன்மை இதுவரை எந்த அதிகாரப்பூர்வ அமைப்பாலும் உறுதிப்படுத்தப்படவில்லை.கான்பூர் ஐஐடி இணையதளத்தில் இருந்ததாக கூறப்படும் பாதுகாப்பு குறைபாடுகள் குறித்து பலமுறை நிர்வாகத்திற்கு தகவல் தெரிவித்ததாகவும், தனது விண்ணப்பத்தை மறுபரிசீலனை செய்யக் கோரி மின்னஞ்சல்கள் அனுப்பியிருந்தும் பதில் கிடைக்கவில்லை என்றும் அவர் குறிப்பிட்டதாக தெரிவிக்கப்படுகிறது.

மேலும், 13 வயது முதல் நிரலாக்கத் துறையில் ஈடுபட்டு வருவதாகவும், சைபர் பாதுகாப்பை கற்றுக்கொள்வதற்காக பல ஆண்டுகளை அர்ப்பணித்துள்ளதாகவும், தனது திறமைக்கு உரிய மதிப்பீடு கிடைக்க வேண்டும் என்றும் கோரிக்கை விடுத்துள்ளார்.இந்த சம்பவம் வெளிச்சத்துக்கு வந்த அதே நேரத்தில், சென்னை ஐஐடி இணையதளத்தின் பாதிக்கப்பட்ட பகுதியை திறக்க முயன்ற பயனர்களுக்கு "502 Bad Gateway" என்ற பிழைச் செய்தி தோன்றியதாக பலரும் தெரிவித்துள்ளனர்.

இதனால் இணையதளம் தற்காலிகமாக செயலிழந்ததாக பரவலாக பேசப்பட்டது.இந்த விவகாரம் சமூக வலைதளங்களில் தீவிர விவாதத்தை ஏற்படுத்தியுள்ளது. சிலர், நோக்கம் எதுவாக இருந்தாலும் அனுமதியின்றி கணினி அமைப்புகளில் ஊடுருவுவது சட்டவிரோதமான செயல் என்றும் கடுமையாக விமர்சித்து வருகின்றனர்.

மற்றொரு தரப்பினர், திறமையான சைபர் பாதுகாப்பு ஆர்வலர்களை அடையாளம் கண்டு அவர்களுக்கு உரிய வாய்ப்புகளை வழங்கும் நடைமுறைகளில் மாற்றம் தேவை என்பதை இந்த சம்பவம் வெளிப்படுத்துவதாக கருத்து தெரிவித்து வருகின்றனர்.இதற்கிடையில், இந்த விவகாரம் தொடர்பாக சென்னை ஐஐடி தரப்பில் அதிகாரப்பூர்வ விளக்கம் வெளியாகுமா என்ற எதிர்பார்ப்பு கல்வி மற்றும் தொழில்நுட்ப வட்டாரங்களில் நிலவி வருவதாக தெரிவிக்கப்படுகிறது.