சென்னை பெருங்குடியில், பொதுத்தேர்வில் தோல்வியடைந்ததை தொடர்ந்து ஏற்பட்ட குடும்பத் தகராறு விபரீதமாக மாறியதில், தாயை கொடூரமாகக் கொலை செய்ததாக பிளஸ்-2 மாணவர் ஒருவர் கைது செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது.

பெருங்குடி பகுதியைச் சேர்ந்த பிளஸ்-2 மாணவர் ஒருவர், சமீபத்தில் வெளியான மேல்நிலைப் பொதுத்தேர்வு முடிவுகளில் தேர்ச்சி பெறவில்லை. மகனின் கல்வி எதிர்காலம் குறித்த கவலையால் அவரது தாய், படிப்பில் கவனம் செலுத்தாதது மற்றும் தேர்வுக்கான தயாரிப்பில் அலட்சியம் காட்டியது குறித்து அடிக்கடி அறிவுரை வழங்கி வந்ததாகக் கூறப்படுகிறது.

இதனால் தாய்-மகன் இடையே அவ்வப்போது கருத்து வேறுபாடும் வாக்குவாதமும் ஏற்பட்டதாக தெரிவிக்கப்பட்டது.இந்தச் சூழலில், நேற்று நள்ளிரவு தந்தை வீட்டில் இல்லாத நேரத்தை பயன்படுத்திக் கொண்ட மாணவர், ஆழ்ந்த உறக்கத்தில் இருந்த தனது தாயை திடீரென தாக்கியதாக தெரிவிக்கப்பட்டது.

ஆத்திரத்தில் அவரது கழுத்தை நெரித்ததுடன், கத்தியால் பலமுறை குத்தியும், பின்னர் வீட்டில் இருந்த கல்லால் தலையில் தாக்கியும் கொடூரமாகக் கொலை செய்ததாக கூறப்படுகிறது.சம்பவம் குறித்து தகவல் கிடைத்ததும், பெருங்குடி காவலர்கள் உடனடியாக சம்பவ இடத்திற்கு விரைந்து சென்று, உயிரிழந்த பெண்ணின் உடலை மீட்டு உடற்கூராய்விற்காக அரசு மருத்துவமனைக்கு அனுப்பி வைத்தனர்.

தொடர்ந்து, கொலைச் சம்பவத்தில் தொடர்புடைய மாணவரை காவலர்கள் கைது செய்து விசாரணைக்காக அழைத்துச் சென்றனர்.முதற்கட்ட விசாரணையில், கைது செய்யப்பட்ட மாணவர் கடந்த சில மாதங்களாக மனநலப் பிரச்சினையால் பாதிக்கப்பட்டு அதற்காக மருத்துவ சிகிச்சை பெற்று வந்தது தெரிவிக்கப்பட்டது.

இருப்பினும், சம்பவத்திற்கான துல்லியமான காரணம் குறித்து காவலர்கள் பல்வேறு கோணங்களில் தீவிர விசாரணை மேற்கொண்டு வருகின்றனர்.தேர்வு தோல்வியைத் தொடர்ந்து ஏற்பட்ட குடும்பத் தகராறு, இறுதியில் தாயின் உயிரைப் பறித்த இந்த துயர சம்பவம், பெருங்குடி மற்றும் சுற்றுவட்டார பகுதிகளில் பெரும் சோகத்தையும் அதிர்ச்சியையும் ஏற்படுத்தியுள்ளது.