தூத்துக்குடி மாநகரில் போதைப்பொருள் கடத்தல் மற்றும் விற்பனைக்கு எதிராக மேற்கொள்ளப்பட்ட அதிரடி நடவடிக்கையில், காரில் பதுக்கி வைத்து கஞ்சா விற்பனை செய்து வந்த இளைஞர் ஒருவரை காவலர்கள் கைது செய்துள்ளனர். அவரிடமிருந்து 1 கிலோ 300 கிராம் கஞ்சாவும், கடத்தலுக்கு பயன்படுத்தப்பட்ட காரும் பறிமுதல் செய்யப்பட்டுள்ளன.

தூத்துக்குடி மாநகரப் பகுதியில் போதைப்பொருள் நடமாட்டத்தை முழுமையாக கட்டுப்படுத்தும் நோக்கில் காவல்துறையினர் தொடர்ந்து தீவிர கண்காணிப்பு மற்றும் ரோந்து பணிகளில் ஈடுபட்டு வருகின்றனர்.இந்த நிலையில், பிரையன்ட் நகர் பகுதியில் கஞ்சா விற்பனை நடைபெற்று வருவதாக தென்பாகம் காவல் நிலைய காவலர்களுக்கு ரகசிய தகவல் கிடைத்தது.

இதையடுத்து உடனடியாக நடவடிக்கையில் இறங்கிய காவலர்கள், சப்-இன்ஸ்பெக்டர் சுப்புராஜ் தலைமையில் பிரையன்ட் நகர் முதல் தெரு பகுதியில் அதிரடி சோதனை மேற்கொண்டனர்.அப்போது சாலையோரத்தில் சந்தேகத்திற்கிடமான முறையில் நிறுத்தப்பட்டிருந்த காரை சோதனையிட்ட காவலர்கள், அதில் பதுக்கி வைக்கப்பட்டிருந்த போதைப்பொருளை கண்டுபிடித்தனர்.

தொடர்ந்து நடத்தப்பட்ட விசாரணையில், காரில் இருந்தவர் தூத்துக்குடி மேல சண்முகபுரம் வண்ணார் 3-வது தெருவைச் சேர்ந்த முத்துக்குமாரின் மகன் தருண்குமார் (21) என்பது தெரியவந்தது.காரை முழுமையாக சோதனையிட்டபோது, விற்பனைக்காக பதுக்கி வைக்கப்பட்டிருந்த 1 கிலோ 300 கிராம் கஞ்சா சிக்கியது.

இதையடுத்து தருண்குமாரை காவலர்கள் கைது செய்து, அவரிடமிருந்து கஞ்சாவையும், கடத்தலுக்கு பயன்படுத்தப்பட்ட காரையும் பறிமுதல் செய்தனர்.இந்த கஞ்சா யாரிடமிருந்து பெறப்பட்டது? இதன் பின்னணியில் செயல்படும் மொத்த விற்பனையாளர் யார்?

இந்த வலையமைப்பில் மேலும் யாருக்கெல்லாம் தொடர்பு உள்ளது? என்பன உள்ளிட்ட பல்வேறு கோணங்களில் காவலர்கள் வழக்குப்பதிவு செய்து தீவிர விசாரணையை முன்னெடுத்து வருகின்றனர்.தூத்துக்குடி மாநகரில் போதைப்பொருள் விற்பனையை முற்றிலுமாக ஒழிக்கும் வகையில் கண்காணிப்பு நடவடிக்கைகள் மேலும் தீவிரப்படுத்தப்பட்டுள்ளதாகவும் தெரிவிக்கப்பட்டுள்ளது.