கன்னியாகுமரி மாவட்டத்தில் இளம் பெண் உயிரிழந்த சம்பவம் தொடர்பான விசாரணையில், அரசியல் கட்சி பிரமுகர் ஒருவர் கைது செய்யப்பட்டுள்ளதால் பரபரப்பு ஏற்பட்டுள்ளது. தற்கொலைக்கு முன்பு அந்தப் பெண் வெளியிட்ட காணொளியில் குறிப்பிட்டிருந்த நபரை தனிப்படை காவலர்கள் கைது செய்து சிறையில் அடைத்துள்ளனர்.

கன்னியாகுமரி மாவட்டம் மூலைப்பாகம் பகுதியைச் சேர்ந்த மகேஷ், துபாயில் மின்சாரப் பணியாளராக வேலை செய்து வருகிறார். அவரது மனைவி அனிஷா, 33, தனியார் பள்ளி அலுவலகத்தில் பணியாற்றி வந்தார்.கடந்த 12-ம் தேதி, அனிஷா தனது கணவருக்கு காணொளி மூலம் சில தகவல்களை அனுப்பியதாகத் தெரிவிக்கப்படுகிறது.

அதில், தான் விருப்பமின்றி ஒரு நபருடன் தொடர்பில் இருந்ததாகவும், அந்த நபர் தன்னை நிம்மதியாக வாழ விடமாட்டார் என்றும் அவர் தெரிவித்திருந்ததாகக் தெரிவிக்கப்படுகிறது.

இதையடுத்து, அனிஷா தூக்குப்போட்டு தற்கொலை செய்துகொண்டார். இந்தச் சம்பவம் குறித்து தகவல் அறிந்த காவலர்கள் வழக்குப்பதிவு செய்து தீவிர விசாரணையைத் தொடங்கினர்.

விசாரணையில், அனிஷா தனது காணொளியில் குறிப்பிட்டிருந்த நபர் த.வெ.க. பிரமுகர் சங்கர் என்பது தெரியவந்ததாகத் தெரிவிக்கப்படுகிறது. இதையடுத்து, சென்னை பல்லாவரத்தில் உள்ள நண்பரின் வீட்டில் தலைமறைவாக இருந்த சங்கரை தனிப்படை காவலர்கள் கைது செய்தனர்.

பின்னர், கைது செய்யப்பட்ட சங்கர் பத்மநாபபுரம் நீதிமன்றத்தில் ஆஜர்படுத்தப்பட்டார். நீதிமன்ற உத்தரவின் பேரில் அவர் சிறையில் அடைக்கப்பட்டார். இந்த வழக்கின் பின்னணி மற்றும் சம்பவத்திற்கான காரணங்கள் குறித்து காவலர்கள் தொடர்ந்து விசாரணை மேற்கொண்டு வருகின்றனர்.