தமிழ்நாடு பள்ளிக்கல்வித்துறையின் கீழ் இயங்கும் அரசு மற்றும் தனியார் பள்ளி மாணவர்களுக்கான காலாண்டு தேர்வுகள் கடந்த செப்டம்பர் 17-ஆம் தேதி தொடங்கி நடைபெற்று வரும் நிலையில், இத்தேர்வுகள் நிறைவடைகின்றன. தேர்வுகளைத் தொடர்ந்து, மாணவர்கள் தேர்வு மன அழுத்தத்திலிருந்து விடுபட்டு போதிய ஓய்வு எடுக்கும் பொருட்டு, செப்டம்பர் 26-ஆம் தேதி முதல் அக்டோபர் 4-ஆம் தேதி வரை காலாண்டுத் தேர்வு விடுமுறை அறிவிக்கப்பட்டுள்ளது. இரண்டாம் பருவத்திற்கான வகுப்புகளுக்காகப் பள்ளிகள் மீண்டும் அக்டோபர் 5-ஆம் தேதி திறக்கப்பட உள்ளன.

இந்நிலையில், இக்காலாண்டு தேர்வு விடுமுறைக் காலத்தில் மாணவர்களுக்குப் பள்ளிகளில் சிறப்பு வகுப்புகளை (Special Classes) நடத்தக் கூடாது எனப் பள்ளிக்கல்வித்துறை கடுமையான தடை விதித்துள்ளது. பாடங்களை முடிப்பதற்காகவோ அல்லது கூடுதல் பயிற்சி அளிப்பதற்காகவோ மாணவர்களை விடுமுறை நாட்களில் பள்ளிக்கு வரவழைக்கக் கூடாது என அறிவுறுத்தப்பட்டுள்ளது.

சிறப்பு வகுப்புகள் மட்டுமன்றி, விடுமுறை நாட்களைப் பயன்படுத்திப் பள்ளிகள் சார்பாக மாணவர்களைச் சுற்றுலா அழைத்துச் செல்லவும் முற்றிலுமாகத் தடை விதிக்கப்பட்டுள்ளது. பள்ளிக்கல்வித்துறையின் இந்த அரசாணை மற்றும் உத்தரவை மீறி ஏதேனும் பள்ளிகளில் சிறப்பு வகுப்புகளோ அல்லது சுற்றுலாக்களோ நடத்தப்பட்டு, அதனால் மாணவர்களுக்கு ஏதேனும் அசம்பாவிதங்களோ அல்லது உடல்நலப் பாதிப்புகளோ ஏற்பட்டால், அதற்குச் சம்பந்தப்பட்ட பள்ளிகளின் தலைமையாசிரியர்களே முழு பொறுப்பேற்க வேண்டும் என்றும், அவர்கள் மீது துறைரீதியான கடுமையான ஒழுங்கு நடவடிக்கை எடுக்கப்படும் என்றும் பள்ளிக்கல்வித்துறை எச்சரித்துள்ளது.