தமிழ்நாட்டின் ஸ்டார்ட்அப் சூழலை மேலும் வலுப்படுத்தும் வகையில், "ஸ்டார்ட்அப் டேட்டா வவுச்சர் திட்டம்" அதிகாரப்பூர்வமாக தொடங்கப்பட்டுள்ளதாக மாநில நிதி மற்றும் தகவல் தொழில்நுட்ப அமைச்சர் பி.டி.ஆர். பழனிவேல் தியாகராஜன் தனது எக்ஸ் பக்கத்தில் அறிவித்துள்ளார்.

இந்தத் திட்டம், கிளவுட் உள்கட்டமைப்பு செலவுகளை குறைத்து, ஸ்டார்ட்அப்கள் விரைவாக வளர்ச்சியடையவும், புதுமைகளை எளிதாக உருவாக்கவும் உதவுகிறது.

ஒவ்வொரு ஸ்டார்ட்அப் நிறுவனத்திற்கும் ஆண்டுக்கு ₹5 லட்சம் என, மொத்தம் 3 ஆண்டுகளுக்கு ₹15 லட்சம் வரை கிளவுட் சேவைச் செலவுகள் திருப்பித் தரப்படும்.

AWS (Amazon Web Services), Microsoft Azure, Oracle, RailTel, Google Cloud போன்ற உலகளாவிய கிளவுட் சேவை நிறுவனங்களிடமிருந்து 5% முதல் 10% வரை தள்ளுபடி கிடைக்கும்.

மொத்த செலவாக ₹10 கோடி ஒதுக்கப்பட்டுள்ளது.

இந்த திட்டத்தின் பயனாளர்களாக, கீழ்க்கண்ட நிறுவனங்கள் பரிந்துரைக்கும் ஸ்டார்ட்அப்கள் தேர்வு செய்யப்படும்:

StartUpTN

iTNT Hub

ELCOT

STPI

FinBlue

இந்தத் திட்டம், தொடக்க நிறுவனங்களின் செயல்பாட்டு செலவைக் குறைக்கும் மட்டுமல்லாமல், அவற்றை உலகத் தரத்தில் போட்டியிடக்கூடிய நிலைக்கு கொண்டு செல்ல உதவும். குறிப்பாக, AI, FinTech, HealthTech, EdTech போன்ற கிளவுட் சார்ந்த துறைகளில் இயங்கும் ஸ்டார்ட்அப்களுக்கு இது மிகப்பெரிய பலனளிக்கிறது.

மேலும், தமிழ்நாடு இந்தியாவில் ஸ்டார்ட்அப் நிறுவனங்களுக்கு மிகவும் உகந்த மாநிலங்களில் ஒன்றாக இருப்பதை வலுப்படுத்தும் என அரசு தெரிவித்துள்ளது.