அறுபடை வீடுகளில் இரண்டாம் படை வீடான திருச்செந்தூர் சுப்பிரமணிய சுவாமி கோயிலில், பக்தர்களின் வசதிக்காக அமைக்கப்பட்ட சண்முக விலாசம் மண்டபம் இரும்பு கிரில் கேட் கொண்டு அடைக்கப்பட்டுள்ளது. அத்துடன், சுவாமி தரிசன நேரத்திலும் கோயில் நிர்வாகம் திடீரெனக் கட்டுப்பாடுகளை விதித்துள்ளதால் பக்தர்கள் கடும் அவதிக்குள்ளாகியுள்ளனர்.

புதிய தரிசன நேரக் கட்டுப்பாடுகள்
கோயில் நிர்வாகம் வைத்துள்ள புதிய அறிவிப்புப் பலகையின்படி:

ரூ.100 கட்டண தரிசனம்: மாலை 6:30 மணி வரை மட்டுமே அனுமதி.

பொது தரிசனம்: இரவு 7:00 மணி வரை மட்டுமே அனுமதி.

விசேஷ மற்றும் விடுமுறை நாட்களில் இந்த நேரத்தில் மாற்றங்கள் செய்யப்படும் எனவும் தெரிவிக்கப்பட்டுள்ளது.

வழக்கமாகச் சாதாரண நாட்களில் காலை 5 மணி முதல் இரவு 9 மணி வரை பக்தர்கள் எவ்விதத் தடையுமின்றி தரிசனத்திற்கு அனுமதிக்கப்பட்டு வந்த நிலையில், தற்போதைய இந்தத் திடீர் நேரக் குறைப்பு பக்தர்களிடையே பெரும் அதிர்ச்சியை ஏற்படுத்தியுள்ளது.

பக்தர்கள் குற்றச்சாட்டு
நாளுக்கு நாள் பக்தர்களின் வருகை பல மடங்கு அதிகரித்து வரும் சூழலில், எவ்வித முன் அறிவிப்புமின்றி, பக்தர்களிடம் கருத்து கேட்காமல் கோயில் நிர்வாகம் தன்னிச்சையாக இத்தகைய முடிவை எடுத்துள்ளதாகப் பொதுமக்கள் குற்றம் சாட்டுகின்றனர்.

மணி கணக்கில் நீண்ட வரிசையில் காத்திருக்கும் சூழல் நிலவுவதால், இரும்புத் தடுப்புகளை அகற்றி, பழைய நேர நடைமுறையையே தொடர வேண்டும் எனப் பக்தர்கள் கோரிக்கை விடுத்துள்ளனர்.