தஞ்சை மாவட்டத்தைச் சேர்ந்த இளைஞரை காதலித்து திருமணம் செய்து கொண்ட 17 வயது சிறுமி, குடும்பத் தகராறைத் தொடர்ந்து தாயார் வீட்டில் தூக்கிட்டு உயிரிழந்த சம்பவம் மயிலாடுதுறை மாவட்டத்தில் பெரும் சோகத்தை ஏற்படுத்தியுள்ளது. இந்த சம்பவம் தொடர்பாக சிறுமியின் கணவர் மீது 'போக்சோ' சட்டத்தின் கீழ் வழக்குப்பதிவு செய்யப்பட்டு கைது செய்யப்பட்டுள்ளார்.

தஞ்சாவூர் மாவட்டம் கும்பகோணம் பகுதியைச் சேர்ந்த 19 வயது இளைஞர், மயிலாடுதுறை அருகே உள்ள கிராமத்தில் வசித்து வந்த தனது உறவினரின் வீட்டிற்கு அடிக்கடி சென்று வந்ததாக தெரிவிக்கப்படுகிறது. அந்த நேரத்தில், அங்கு வசித்து வந்த 17 வயது சிறுமியுடன் அவருக்கு அறிமுகம் ஏற்பட்டது.

நாளடைவில் அந்த அறிமுகம் காதலாக மலர்ந்த நிலையில், இருவரும் குடும்பத்தினரின் விருப்பத்தை மீறி நான்கு மாதங்களுக்கு முன்பு வீட்டை விட்டு வெளியேறி, திருச்செந்தூரில் திருமணம் செய்து கொண்டதாக தெரிவிக்கப்படுகிறது. அதன் பின்னர் கும்பகோணத்தில் தனியாக குடும்ப வாழ்க்கையை நடத்தி வந்துள்ளனர்.

திருமணத்திற்கு பிறகு, இளைஞருக்கு இருந்த மதுப் பழக்கம் காரணமாக கணவன்–மனைவி இடையே அடிக்கடி கருத்து வேறுபாடுகளும் குடும்பத் தகராறுகளும் ஏற்பட்டதாக தெரிவிக்கப்படுகிறது. இதனால் சிறுமி மன உளைச்சலில் இருந்து வந்ததாகவும் கூறப்படுகிறது.இந்த நிலையில், நேற்று முன்தினம் இருவரும் மொபட்டில் சிறுமியின் தாயார் வீட்டிற்கு சென்று கொண்டிருந்தனர். அப்போது இளைஞர் மதுபோதையில் இருந்ததாக தெரிவிக்கப்படுகிறது.

மயிலாடுதுறை மாவட்டம் குத்தாலம் அருகே சென்றபோது, மொபட்டின் கட்டுப்பாடு இழந்ததால் இருவரும் சாலையில் கீழே விழுந்தனர்.இந்த சம்பவத்திற்குப் பிறகு, சிறுமி தனது தாயாரை செல்பேசியில் தொடர்புகொண்டு வரவழைத்தார். பின்னர், காயமடைந்த கணவரை ஆட்டோவில் அனுப்பி வைத்ததுடன், தாயாருடன் மொபட்டில் வீட்டிற்கு திரும்பியதாக தெரிவிக்கப்படுகிறது.

வீட்டிற்கு சென்ற சில நேரங்களில், மனவேதனையில் இருந்த சிறுமி சேலையால் தூக்கிட்டு உயிரை மாய்த்துக் கொண்டதாக தெரிவிக்கப்படுகிறது. இதைக் கண்ட அவரது தாயார் கதறி அழுத சம்பவம் அப்பகுதியில் பெரும் சோகத்தை ஏற்படுத்தியது.

இதுகுறித்து தகவல் கிடைத்ததும் மணல்மேடு காவலர்கள் சம்பவ இடத்திற்கு விரைந்து சென்று, சிறுமியின் உடலை மீட்டு பிரேத பரிசோதனைக்காக மயிலாடுதுறை அரசு மருத்துவமனைக்கு அனுப்பி வைத்தனர்.

தொடர்ந்து நடைபெற்ற விசாரணையில், சிறுமி வயது குறைந்தவர் என்பதால், அவரது கணவர் மீது 'போக்சோ' சட்டத்தின் கீழ் வழக்குப்பதிவு செய்து காவலர்கள் கைது செய்தனர்.

காதலித்து திருமணம் செய்து கொண்ட சில மாதங்களிலேயே இந்த துயரமான சம்பவம் நிகழ்ந்திருப்பது இரு குடும்பத்தினரையும் ஆழ்ந்த சோகத்தில் ஆழ்த்தியுள்ளது. சம்பவத்தின் முழு பின்னணி மற்றும் உயிரிழப்பிற்கான காரணங்கள் குறித்து காவலர்கள் தொடர்ந்து விரிவான விசாரணை மேற்கொண்டு வருகின்றனர்.