மழைக்காலம் மற்றும் பருவநிலை மாற்றங்களின் போது இருமல், தொண்டை வலி, தொண்டை கரகரப்பு, குரல் மாற்றம், தொண்டை எரிச்சல் போன்ற பாதிப்புகள் பலருக்கும் ஏற்படுகின்றன. இத்தகைய பிரச்சினைகளில் இருந்து நிவாரணம் பெற, வீட்டிலேயே எளிதாக பின்பற்றக்கூடிய சில பாரம்பரிய வைத்திய முறைகள் உதவியாக இருக்கும்.

ஆடாதோடை இலை இரண்டு மற்றும் ஐந்து மிளகுகளை எடுத்து, பனைவெல்லம், நாட்டுச் சர்க்கரை அல்லது தேன் ஆகியவற்றில் ஏதேனும் ஒன்றுடன் சேர்த்து நன்றாக மென்று சாப்பிடலாம். இது இருமலைக் குறைப்பதோடு, தொண்டை எரிச்சலையும் தணிக்க உதவும்.

ஐந்து சின்ன வெங்காயங்களை நாட்டுவெல்லத்துடன் சேர்த்து மென்று சாப்பிடுவது, தொண்டை வலி மற்றும் சளி தொந்தரவுக்கு நிவாரணம் அளிக்கும் பாரம்பரிய முறையாகும்.ஒரு டம்ளர் பாலில் மிளகுத்தூள் மற்றும் சிறிதளவு மஞ்சள் சேர்த்து நன்றாகக் காய்ச்சி வெதுவெதுப்பாக குடிப்பது, தொண்டை அழற்சியைக் குறைத்து உடலுக்கு இதமளிக்கும்.

முட்டையை அரைவேக்காட்டில் வேகவைத்து, அதனுடன் மிளகு, மஞ்சள் மற்றும் சீரகம் தூவி சாப்பிடுவதும் உடலுக்கு தேவையான சக்தியை அளிப்பதுடன், தொண்டை பாதிப்பிலிருந்து மீள உதவுகிறது.

சிற்றரத்தை, சுக்கு, மிளகு, திப்பிலி, கொத்தமல்லி மற்றும் அதிமதுரம் ஆகியவற்றை சம அளவில் சேர்த்து பொடியாக அரைத்து வைத்துக்கொள்ளலாம். இதில் சிறிதளவு பொடியுடன் பனங்கற்கண்டு சேர்த்து ஒரு டம்ளர் தண்ணீரில் கொதிக்க வைத்து குடித்தால், இருமல் மற்றும் தொண்டை அடைப்பு குறைய உதவும்.

பூண்டு சாறுடன் சிறிதளவு தேன் கலந்து மெதுவாக தொண்டைப் பகுதியில் தடவுவது, தொண்டை எரிச்சல் மற்றும் கரகரப்பை தணிக்க உதவுகிறது.வெதுவெதுப்பான நீரில் சிறிதளவு உப்பு கலந்து, வாய் மற்றும் தொண்டையை நன்றாக கொப்பளிப்பது கிருமிகளை குறைத்து தொண்டை வலிக்கு நிவாரணம் அளிக்கும்.தாளிசாதி வடகம் போன்ற பாரம்பரிய மூலிகை மாத்திரைகளை ஒன்று அல்லது இரண்டு அளவு மென்று சாப்பிடுவது, தொண்டை கரகரப்பு மற்றும் இருமலைக் கட்டுப்படுத்த உதவக்கூடும்.

மேலும், நாள் முழுவதும் போதுமான அளவு வெந்நீரை கொதிக்க வைத்து இளஞ்சூட்டில் குடிப்பது, தொண்டையை ஈரப்பதத்துடன் வைத்திருப்பதோடு சளி மற்றும் இருமல் பாதிப்பிலிருந்து விரைவில் மீள உதவும்.
குறிப்பு: அறிகுறிகள் சில நாட்களுக்கும் மேலாக நீடித்தாலோ, அதிக காய்ச்சல், மூச்சுத்திணறல் அல்லது கடுமையான தொண்டை வலி ஏற்பட்டாலோ, தாமதிக்காமல் தகுதியான மருத்துவரை அணுகுவது அவசியம்.