தமிழகத்தில் செயல்பட்டு வரும் தனியார் மருத்துவம் மற்றும் பல் மருத்துவக் கல்லூரிகளில், எஸ்சி, எஸ்சிஏ, எஸ்டி மற்றும் எஸ்சிசி (SC, SCA, ST, SCC) பிரிவுகளைச் சேர்ந்த மாணவர்களிடம் சேர்க்கையின் போது முன் கல்விக்கட்டணம் செலுத்த வற்புறுத்துவதாகத் தொடர்ச்சியாகப் பல்வேறு புகார்கள் மருத்துவ சேர்க்கைக்குழுவிற்கு வந்துள்ளன. இச்சம்பவங்களைத் தொடர்ந்து, எஸ்சி/எஸ்டி பிரிவு மாணவர்களுக்கான கல்வி உரிமையை உறுதி செய்யும் வகையில் மருத்துவ சேர்க்கைக்குழு அனைத்துத் தனியார் மருத்துவக் கல்லூரிகளுக்கும் முக்கிய வழிகாட்டுதல்களை வெளியிட்டுள்ளது.

வருமான வரம்பு & முன் கட்டண விலக்கு:

அரசு வெளியிட்டுள்ள அறிவிப்பின்படி, பெற்றோரின் ஆண்டு வருமானம் ரூ.2.50 லட்சத்திற்கும் குறைவாக இருக்கும் எஸ்சி, எஸ்சிஏ, எஸ்டி மற்றும் கிறிஸ்துவ மதத்திற்கு மாறிய பட்டியலின (SCC) மாணவர்களுக்குக் கல்விக்கட்டணம் செலுத்துவதில் இருந்து முழு விலக்கு அளிக்கப்படுகிறது. கட்டண நிர்ணயக் குழுவால் (Fee Determination Committee) நிர்ணயிக்கப்பட்ட கல்விக்கட்டணம் மற்றும் மேம்பாட்டுக் கட்டணங்களை (Development Fee) சேர்க்கையின் போது முன்கூட்டியே செலுத்துமாறு கல்லூரிகள் மாணவர்களையோ அல்லது பெற்றோரையோ எந்தச் சூழலிலும் கட்டாயப்படுத்தக் கூடாது எனத் தெரிவிக்கப்பட்டுள்ளது.

நிபந்தனையற்ற சேர்க்கை அனுமதி:

கட்டணம் செலுத்தவில்லை என்ற காரணத்தைக் கூறி எந்தவொரு மாணவருக்கும் சேர்க்கையை மறுக்கக் கூடாது எனத் திட்டவட்டமாக உத்தரவிடப்பட்டுள்ளது. தகுதியான மாணவர்கள் கட்டணம் ஏதும் செலுத்தாமலேயே படிப்பில் சேரக் கல்லூரிகள் உடனடியாக அனுமதி வழங்க வேண்டும்.

மாணவர் சேர்க்கை நடைமுறைகள் அனைத்தும் முழுமையாக நிறைவடைந்த பின்னரே, அரசால் நிர்ணயிக்கப்பட்ட கட்டணம் நேரடியாகக் கல்லூரிகளுக்குத் திரும்ப வழங்கப்படும் (Reimbursement) என்பதால், அரசு நிதியுதவியைக் காரணம் காட்டி மாணவர்களை அலைக்கழிப்பதைத் தவிர்க்க வேண்டும் என்றும், இக்கட்டளைகளை மீறும் தனியார் கல்லூரிகள் மீது கடுமையான நடவடிக்கை எடுக்கப்படும் என்றும் மருத்துவ சேர்க்கைக்குழு எச்சரித்துள்ளது.