மயிலாடுதுறை மாவட்டம் தரங்கம்பாடி அருகே காதல் ஜோடி இருவர் மர்மமான முறையில் உயிரிழந்த சம்பவம் பெரும் அதிர்ச்சியையும் பரபரப்பையும் ஏற்படுத்தியுள்ளது. காதலர்கள் இருவரும் தூக்கில் தொங்கிய நிலையில் மீட்கப்பட்டதைத் தொடர்ந்து, இது தற்கொலையா அல்லது ஆணவக் கொலையா என்ற கேள்வி தீவிரமாக எழுந்துள்ளது. சம்பவத்தைத் தொடர்ந்து இரு கிராமங்களிலும் பதற்றம் வெடித்த நிலையில், வீடுகள் தாக்கப்பட்டு பொருட்கள் சேதப்படுத்தப்பட்டன.

இதனால் அப்பகுதி முழுவதும் பரபரப்பான சூழல் நிலவி வருகிறது.தரங்கம்பாடி அருகே புதுப்பாளையம் சுனாமி குடியிருப்பு பகுதியைச் சேர்ந்த மாரிமுத்துவின் மகன் பார்த்திபன் (19), விவசாய கூலி தொழிலாளியாக பணியாற்றி வந்தார். அருகிலுள்ள சாத்தங்குடி கிராமத்தைச் சேர்ந்த லட்சுமிகாந்தனின் மகள் திவ்யதர்ஷினி (17) உடன் அவருக்கு காதல் ஏற்பட்டிருந்ததாக தெரிவிக்கப்படுகிறது.

பிளஸ்-2 படிப்பை முடித்த திவ்யதர்ஷினி, கல்லூரியில் சேர காத்திருந்தார். இருவரும் வெவ்வேறு சமூகத்தைச் சேர்ந்தவர்கள் என்பதால், இவர்களின் காதலுக்கு குடும்பத்தினர் கடுமையான எதிர்ப்பு தெரிவித்துள்ளனர். இதனால் இரு குடும்பங்களுக்கும் இடையே தொடர்ந்து பதற்றம் நிலவி வந்ததாக தெரிவிக்கப்படுகிறது.

நேற்று முன்தினம் ஏற்பட்ட மோதலில், திவ்யதர்ஷினியின் உறவினர்கள் பார்த்திபனை சாதிப் பெயரை கூறி தாக்கியதாக அவரது உறவினர்கள் பொறையாறு காவல் நிலையத்தில் புகார் அளித்திருந்தனர்.இதற்கிடையில், நேற்று அதிகாலை திவ்யதர்ஷினி காணாமல் போனதாக அவரது தந்தை லட்சுமிகாந்தன் புகார் அளித்தார்.

இதையடுத்து காவலர்கள் உடனடியாக விசாரணையை தொடங்கினர்.இந்த விசாரணையின் போது பார்த்திபனின் செல்போன் சிக்னலை கண்காணித்த காவலர்கள், சாத்தங்குடி பாம்பாலம்மன் கோவில் எதிரே உள்ள இடத்தில் அவர் இருப்பதை கண்டறிந்தனர்.உடனடியாக அங்கு சென்ற காவலர்கள், ஒரு சிறிய கீற்றுக்கொட்டகையில் பார்த்திபன் மற்றும் திவ்யதர்ஷினி இருவரும் தனித்தனியாக தூக்கில் தொங்கிய நிலையில் இருந்ததை கண்டு அதிர்ச்சி அடைந்தனர்.

இருவரின் உடல்களும் மீட்கப்பட்டு பிரேத பரிசோதனைக்காக திருவாரூர் அரசு மருத்துவக்கல்லூரி மருத்துவமனைக்கு அனுப்பி வைக்கப்பட்டன.மேலும், காதல் ஜோடி மரணச் செய்தி பரவியவுடன், பார்த்திபனின் உறவினர்கள் மற்றும் கிராம மக்கள் மத்தியில் கடும் ஆவேசம் வெடித்தது.இது ஆணவக் கொலை என சந்தேகம் எழுப்பிய அவர்கள், திவ்யதர்ஷினியின் வீடு மற்றும் அவரது உறவினர்களின் வீடுகளை தாக்கி சேதப்படுத்தினர்.

அங்கு நிறுத்தப்பட்டிருந்த 4 மோட்டார் சைக்கிள்களும் அடித்து நொறுக்கப்பட்டன.இதனால் அப்பகுதி முழுவதும் பதற்றம் தீவிரமடைந்தது. பாதுகாப்பு நடவடிக்கையாக 200-க்கும் மேற்பட்ட காவலர்கள் குவிக்கப்பட்டு கண்காணிப்பு பலப்படுத்தப்பட்டுள்ளது.இந்த சம்பவ இடத்தை மாவட்ட காவல் கண்காணிப்பாளர் (பொறுப்பு) ஸ்டாலின் உள்ளிட்ட அதிகாரிகள் நேரில் பார்வையிட்டு ஆய்வு செய்தனர்.காதலர்கள் தற்கொலை செய்து கொண்டார்களா? அல்லது ஆணவக் கொலை செய்யப்பட்டார்களா? என்ற இரு கோணங்களிலும் காவலர்கள் தீவிர விசாரணை மேற்கொண்டு வருகின்றனர்.

பிரேத பரிசோதனை அறிக்கை வெளியான பின்னரே முழு உண்மை வெளிச்சத்துக்கு வரும் என தெரிவிக்கப்படுகிறது.பார்த்திபன் மரணத்தை கொலை வழக்காக பதிவு செய்ய வேண்டும் என வலியுறுத்தி பல்வேறு அரசியல் கட்சியினர் மற்றும் சமூக அமைப்புகள் பொறையாறு காவல் நிலையம் முன்பு திரண்டனர்.பின்னர் பார்த்திபனின் உறவினர்கள் மற்றும் ஆதரவாளர்கள் சாத்தங்குடி தரங்கம்பாடி சாலையில் சாலைமறியல் போராட்டத்தில் ஈடுபட்டனர்.

பார்த்திபன் மரணத்தை கொலை வழக்காக பதிவு செய்யும் வரை உடலை பெற்றுக்கொள்ள மாட்டோம் என போராட்டக்காரர்கள் உறுதியுடன் தெரிவித்தனர்.இதனையடுத்து சாலைமறியலில் ஈடுபட்டவர்கள் கைது செய்யப்பட்டனர். இந்த போராட்டத்தால் மயிலாடுதுறை–தரங்கம்பாடி சாலையில் போக்குவரத்து கடுமையாக பாதிக்கப்பட்டது.இந்த சம்பவம் மயிலாடுதுறை மாவட்டம் முழுவதும் பெரும் அதிர்வலைகளை ஏற்படுத்தி, சமூக நல்லிணக்கத்தைப் பற்றிய கேள்விகளையும் மீண்டும் எழுப்பியுள்ளது.