இந்தியாவில் அசம்பாவித சம்பவங்கள் மற்றும் பயங்கரவாத நடவடிக்கைகளைத் தடுக்கும் வகையில், தீவிரவாத இயக்கங்களின் செயல்பாடுகளும், அவற்றுடன் தொடர்புடையவர்களின் நடவடிக்கைகளும் பாதுகாப்பு அமைப்புகளால் தொடர்ந்து கண்காணிக்கப்பட்டு வருகின்றன.இந்த நிலையில், உத்தரபிரதேசத்தைச் சேர்ந்த சில வாலிபர்கள் சமூக வலைதளக் குழுவை உருவாக்கி, வெளிநாட்டில் செயல்பட்டு வரும் ஐ.எஸ். தீவிரவாத அமைப்புக்கு ஆதரவாக ஆட்களை திரட்டியதாக விசாரணையில் தெரியவந்துள்ளது.

அந்த அமைப்பின் கொள்கைகளால் ஈர்க்கப்பட்டதாக தெரிவிக்கப்படும் அவர்கள், வாட்ஸ்அப் குழு வாயிலாக வெடிகுண்டு தயாரிப்பது தொடர்பான காணொலிகளைப் பகிர்ந்ததுடன், பாகிஸ்தான் மற்றும் ஆப்கானிஸ்தானைச் சேர்ந்த இணைய ஊடுருவல்காரர்களுடன் தொடர்பில் இருந்ததாகவும் கண்டறியப்பட்டுள்ளது.மேலும், இளைஞர்களை மூளைச்சலவை செய்து, அவர்களை தீவிரவாத அமைப்புக்கு ஆதரவாக செயல்பட தூண்டியதாகவும் விசாரணையில் தெரியவந்ததாக தெரிவிக்கப்படுகிறது.

இதையடுத்து, இந்தச் சம்பவத்தில் தொடர்புடையவர்களை கண்டறிந்து கைது செய்வதற்காக தீவிரவாத தடுப்பு பிரிவு அதிகாரிகள் தீவிரமாக களமிறங்கினர்.இதன் தொடர்ச்சியாக, கடந்த 12-ந் தேதி உத்தரபிரதேச மாநிலம் ஆசம்காத் பகுதியைச் சேர்ந்த முகமது நபீல் என்பவரை அந்த மாநில தீவிரவாத தடுப்பு படையினர் கைது செய்தனர்.

அவரிடம் நடத்தப்பட்ட விசாரணையில் கிடைத்த தகவல்களின் அடிப்படையில், உத்தரபிரதேசத்தின் சித்தார்த்நகர் மாவட்டத்தைச் சேர்ந்த அப்துல்குத்தூஸ் என்பவரின் மகன் மக்சூத் அலி என்ற 19 வயது வாலிபருக்கும் இந்தச் செயல்பாடுகளில் முக்கிய தொடர்பு இருப்பது தெரியவந்ததாக தெரிவிக்கப்படுகிறது.இதையடுத்து மக்சூத் அலி குறித்து தீவிரமாக விசாரித்தபோது, அவர் பெங்களூரில் தங்கியிருந்து அங்குள்ள மனிதவள முகமை நிறுவனம் ஒன்றில் பணியாற்றி வந்தது தெரியவந்தது.

உத்தரபிரதேச தீவிரவாத தடுப்பு படையினர் பெங்களூருக்கு விரைந்து சென்று விசாரணை மேற்கொண்டனர். ஆனால், அதற்குள் மக்சூத் அலி அங்கிருந்து புறப்பட்டிருந்தார்.அவர் தனது சக ஊழியர்களுடன் கோவையில் நடைபெறும் கண்காட்சி ஒன்றில் பங்கேற்பதற்காக சென்றிருப்பதாக தெரியவந்தது.

இதையடுத்து உத்தரபிரதேச தீவிரவாத தடுப்பு பிரிவு அதிகாரிகள், கோவை காவலர்களின் உதவியை நாடினர்.மக்சூத் அலியை தேடும் பணியில் கோவை காவலர்கள் தீவிரமாக ஈடுபட்டனர். அப்போது அவர் கோவை ஹோப்கல்லூரி அருகே உள்ள ஓட்டல் ஒன்றில் நண்பர்களுடன் தங்கியிருப்பது தெரியவந்தது.

உடனடியாக உத்தரபிரதேச தீவிரவாத தடுப்பு பிரிவு அதிகாரிகளும், கோவை காவலர்களும் இணைந்து அந்த ஓட்டலுக்கு விரைந்தனர்.அங்கு அதிரடியாக சுற்றிவளைத்த காவலர்கள், மக்சூத் அலியை மடக்கிப் பிடித்து கைது செய்தனர். அவர் பெங்களூருக்கு புறப்படுவதற்காக தயாராக இருந்ததாகவும், அதற்குள் காவலர்கள் அவரை கைது செய்ததாகவும் தெரிவிக்கப்படுகிறது.

கைது செய்யப்பட்ட மக்சூத் அலியை தமிழக காவலர்கள், உத்தரபிரதேச காவலர்களிடம் ஒப்படைத்தனர். இதையடுத்து அவர் லக்னோவுக்கு அழைத்துச் செல்லப்பட்டார்.அங்கு அவரிடம் தீவிர விசாரணை நடைபெற்று வருகிறது.

முதற்கட்ட விசாரணையில், மக்சூத் அலி வாட்ஸ்அப் குழு மூலம் இளைஞர்களை தீவிரவாத இயக்கத்தில் சேர தூண்டியதாகவும், இதற்காக தனியாக சமூக வலைதளப் பக்கத்தையும் தொடங்கி ஆட்களை திரட்டியதாகவும் தெரியவந்துள்ளதாக காவலர்கள் தரப்பில் தெரிவிக்கப்பட்டுள்ளது.இந்தச் செயல்பாடுகளின் பின்னணியில் வேறு யாருக்கெல்லாம் தொடர்பு உள்ளது என்பது குறித்தும் விசாரணை தொடர்ந்து நடைபெற்று வருகிறது.