'தி நியூ இந்தியன் எக்ஸ்பிரஸ்' நாளிதழுக்கு பேட்டியளித்த அமித் ஷா, அதிமுக-பாஜக கூட்டணி ஆட்சியில் பாஜக பங்கு பெறும் என தெரிவித்திருந்தார்.

இந்நிலையில், 2026 சட்டப்பேரவைத் தேர்தலில் அதிமுக தனியாகவே வெற்றி பெற்று ஆட்சி அமைக்கும் என்று அக்கட்சியின் பொதுச்செயலாளர் மற்றும் எதிர்க்கட்சித் தலைவர் எடப்பாடி பழனிசாமி உறுதிபட தெரிவித்துள்ளார்.

“மக்களைக் காப்போம், தமிழகத்தை மீட்போம்” என்ற தலைப்பில் தமிழகம் முழுவதும் சுற்றுப்பயணம் மேற்கொண்டுவரும் எடப்பாடி பழனிசாமி, இன்றைய சேலம் பயணத்தின் தொடக்கமாக செய்தியாளர்களை சந்தித்த போது இதனை தெரிவித்தார்.

மேலும், "அதிமுக கூட்டணி வலிமையாக உள்ளது. 2026 தேர்தலில் அமோக வெற்றி பெறும். மக்களிடையே எழுச்சி அதிகமாக உள்ளது. திமுக ஆட்சியில் எந்த நன்மையும் கிடைக்காததால், மக்கள் மாற்றத்தை விரும்புகிறார்கள். சட்டம் ஒழுங்கு சீர்குலைந்துள்ளது, ஊழல் எல்லை மீறியுள்ளது,” என்றார்.

'உங்களுடன் ஸ்டாலின்' திட்டம் வெறும் தேர்தல் நாடகம் என்றும், “மக்கள் செல்போன் எண்களை சேகரித்து, திமுகவின் ஐடி அணியிடம் கொடுக்கின்றனர்” என அவர் குற்றம்சாட்டினார்.

தற்போது அதிமுக கூட்டணியில் பல கட்சிகள் இணைவதற்கான வாய்ப்பு இருப்பதாகவும், அதிமுக தலைமையிலான கூட்டணி மிகுந்த பலத்துடன் வெற்றியடையும் என்றும் கூறினார்.