ஓட்டுநர், நடத்துனர்களுக்கு பயோமெட்ரிக் முறையில் வருகை பதிவு - சென்னை மா.போ.கழகம் அறிவிப்பு.!!

சென்னை மாநகர பேருந்தில் பணிபுரியும் ஊழியர்களுக்கு பயோமெட்ரிக் மூலம் வருகை பதிவு செய்யப்படும் முறை அறிமுகப்படுத்தப்பட்டுள்ளது. இது குறித்து சென்னை மாநகர போக்குவரத்துக் கழக மேலாண் இயக்குனர் பிரபு சங்கர் வெளியிட்டுள்ள செய்திக்குறிப்பில் தெரிவித்து இருப்பதாவது:-

"சென்னை மாநகர போக்குவரத்துக் கழகத்தில் பணிபுரியும் அனைத்து பணியாளர்களும் தங்களின் வருகையை பயோமெட்ரிக் மூலம் தவறாமல் பதிவு செய்ய வேண்டும் என்று கடந்த 2024-ம் ஆண்டு ஜூலை 1-ந் தேதி தெரிவிக்கப்பட்டது.

மாநகர போக்குவரத்துக் கழகத்தின் தலைமை அலுவலகம், அனைத்து பணிமனைகள், தொழிற்கூடங்கள் உள்ளிட்டவற்றில் பணிபுரியும் ஓட்டுநர், நடத்துனர், தொழில்நுட்ப பணியாளர்கள், அலுவலக பணியாளர்கள் உள்ளிட்டோர் பயோமெட்ரிக் மூலமாகவே வருகையை பதிவு செய்ய வேண்டும் என்று மீண்டும் அறிவுறுத்தப்படுகிறது.

அதன்படி, 21-ந் தேதி திங்கட்கிழமையான இன்று முதல் பயோமெட்ரிக் மூலம் பதிவு செய்யும் ஊழியர்களின் வருகை மட்டுமே கணக்கில் கொள்ளப்படும்" என்றுத் தெரிவிக்கப்பட்டுள்ளது.