தி.மு.க. கொடி அகற்றம்: அ.தி.மு.க., தே.மு.தி.க.வினர் மறியல் போராட்டம்!

வேலூர் பழைய மாநகராட்சி வளாகத்தில் உள்ள அண்ணா சிலைக்கு அ.தி.மு.க மற்றும் தே.மு.தி.கவினர் இன்று காலை அண்ணா பிறந்த நாளை முன்னிட்டு மாலை அணிவிக்க சென்றனர்.

அப்போது தி.மு.க கொடி அண்ணா சிலைக்கு முன்பு இருந்த தடுப்பு தூணில் கட்டப்பட்டிருந்தது. இதற்கு அ.தி.மு.கவினர் கடும் கண்டனம் தெரிவித்தனர்.

மேலும் அ.தி.மு.க மாநகர் மாவட்ட செயலாளர், தகவல் தொழில்நுட்ப மண்டல செயலாளர், தே.மு.தி.க மாநகர் மாவட்ட செயலாளர் உள்ளிட்ட கட்சியினர் அண்ணா சிலைக்கு முன்பு திடீரென சாலை மறியலில் ஈடுபட்டனர்.

இதனால் போக்குவரத்து பாதிக்கப்பட்டு வாகனங்கள் சாலையில் அணிவகுப்பு நின்றனர். இது குறித்து தகவல் அறிந்து வந்த போலீசார் சாலை மறியலில் ஈடுபட்டவர்களிடம் பேச்சுவார்த்தை நடத்தினர்.

அப்போது மறியலில் ஈடுபட்டவர்கள் தி.மு.க கொடியை அகற்ற வேண்டும் என தெரிவித்துள்ளனர். இதனை அடுத்து திமுக கொடி அகற்றப்பட்டது.

பின்னர் அனைவரும் கலைந்து சென்று அண்ணா சிலைக்கு மாலை அணிவித்து மரியாதை செலுத்தினர். இதனால் அப்பகுதியில் சிறிது நேரம் பரபரப்பு நிலவியது.