தமிழ்நாடு அரசியல் வரலாற்றில் புதியதொரு புரட்சிகர அத்தியாயத்தை எழுதியுள்ள முதலமைச்சர் சி. ஜோசப் விஜய் தலைமையிலான தமிழக வெற்றிக் கழக அரசு, தனது புதிய அமைச்சரவையில் இளைஞர்களுக்கு முன்னெப்போதும் இல்லாத வகையில் மிகப்பெரிய முக்கியத்துவத்தை அளித்துள்ளது. இன்று கிண்டி ஆளுநர் மாளிகையில் நடைபெற்ற பிரம்மாண்ட அமைச்சரவை விரிவாக்கத்தில், தமிழகத்தின் மிக இளம் வயது அமைச்சர் என்ற வரலாற்றுச் சாதனையை 28 வயதேயான எஸ். கமலி படைத்துள்ளார்.

மத்திய அமைச்சரை வீழ்த்திய அவிநாசி ‘கமலி’:

திருப்பூர் மாவட்டத்தின் அவிநாசி (தனி) தொகுதியில் தவெக சார்பில் போட்டியிட்ட 28 வயது பட்டதாரிப் பெண்ணான எஸ். கமலி, தன்னை எதிர்த்துப் போட்டியிட்ட மத்திய பாஜக மூத்த அமைச்சரான எல். முருகனை 15,373 வாக்குகள் வித்தியாசத்தில் அதிரடியாக வீழ்த்தி மாபெரும் அரசியல் திருப்பத்தை ஏற்படுத்தினார். 28 வயதில் சட்டமன்றத்திற்குள் நுழைந்த இளம் எம்.எல்.ஏ-க்களாகப் பெரியகுளம் சபரி ஐயங்கரன் மற்றும் அவிநாசி கமலி ஆகியோர் சாதனை படைத்திருந்த சூழலில், தற்போது கமலிக்கு புதிய அமைச்சரவையில் கால்நடைத் துறை அமைச்சர் பொறுப்பு ஒதுக்கப்பட்டுள்ளது. இதன் மூலம் தமிழகத்தின் மிக இளைய அமைச்சர் என்ற மகுடம் இவருக்குக் கிடைத்துள்ளது.

அமைச்சரவையை அலங்கரிக்கும் தவெக-வின் இளம்படை:

முதலமைச்சர் விஜய் தனது அமைச்சரவையில் பாரம்பரிய அரசியல் வட்டாரங்களை உடைத்து, துடிப்புமிக்க இளம் தலைமுறையினரைத் தேர்வு செய்து முக்கிய நிர்வாகப் பொறுப்புகளை வழங்கியுள்ளார்:

அமைச்சர் கீர்த்தனா (29 வயது): கடந்த மே 10-ஆம் தேதி நடைபெற்ற முதற்கட்டப் பதவியேற்பின் போதே சிவகாசி தொகுதியின் 29 வயது இளம் எம்.எல்.ஏ-வான கீர்த்தனா அமைச்சராகப் பொறுப்பேற்றார். இவர் முன்னாள் அமைச்சர் ராஜேந்திர பாலாஜி மற்றும் காங்கிரஸ் வேட்பாளரை வீழ்த்தியவர் என்பது குறிப்பிடத்தக்கது.

அமைச்சார் ரமேஷ் (31 வயது): ஸ்ரீரங்கம் தொகுதியில் வென்ற 31 வயதான ரமேஷிற்கு, தமிழகத்தின் மிக முக்கியத்துவம் வாய்ந்த துறைகளில் ஒன்றான இந்து சமய அறநிலையத் துறை ஒதுக்கப்பட்டுள்ளது.

பிற இளம் அமைச்சர்கள்: இவர்களுடன் அறந்தாங்கி முகமது ஃபர்வாஸ், தாம்பரம் சரத்குமார், மற்றும் கிணத்துக்கடவு விக்னேஷ் உள்ளிட்ட பல இளம் எம்.எல்.ஏ-க்களுக்கும் அமைச்சரவையில் அமைச்சர்களாகச் செயல்படப் பொன்னான வாய்ப்புகள் வழங்கப்பட்டுள்ளன.

புதிய அரசியல் விடியல்: "தலைமுறை மாற்றம்" என்ற முழக்கத்துடன் களம் கண்ட தவெக, வெறும் பேச்சோடு நிறுத்தாமல் 30 வயதுக்குட்பட்ட இளைஞர்களின் கைகளில் நேரடியாகப் பதவிகளையும் அதிகாரத்தையும் கொடுத்து அழகு பார்த்துள்ளது.