தமிழ்நாட்டின் முதலமைச்சராக நடிகரும் தமிழக வெற்றிக் கழகத்தின் தலைவருமான விஜய் பதவியேற்றதிலிருந்து, அவரது அரசியல் நடவடிக்கைகள் குறித்து பல்வேறு தரப்பினரும் கருத்து தெரிவித்து வருகின்றனர். குறிப்பாக திரையுலகைச் சேர்ந்த பலர், விஜய்யின் ஆரம்பகட்ட ஆட்சி செயல்பாடுகளை பாராட்டி வருகின்றனர்.அந்த வரிசையில், மூத்த இயக்குநரும் அதிமுக ஆதரவாளருமான ஆர்.வி. உதயகுமார், முதலமைச்சர் விஜய்க்கு பாராட்டு தெரிவித்துள்ளார்.

தமிழக அரசியலில் கடந்த பல தசாப்தங்களாக சினிமா மற்றும் அரசியல் இடையே நெருங்கிய தொடர்பு இருந்து வருகிறது. பேரறிஞர் அண்ணா, கலைஞர் கருணாநிதி, எம்.ஜி.ஆர்., ஜெயலலிதா, மு.க.ஸ்டாலின் முதல் தற்போதைய முதலமைச்சர் விஜய் வரை, திரைத்துறையுடன் தொடர்புடைய பலர் தமிழக அரசியலில் முக்கிய பங்காற்றியுள்ளனர்.

இந்த நிலையில், சினிமா உலகிலிருந்து அரசியலுக்கு வந்து ஆட்சியை பிடித்துள்ள விஜய்க்கு திரையுலகினர் தொடர்ந்து வாழ்த்து தெரிவித்து வருகின்றனர். தென்னிந்திய நடிகர் சங்க நிர்வாகிகளும் நேரில் சந்தித்து வாழ்த்து தெரிவித்திருந்தனர்.

செய்தியாளர்களை சந்தித்த ஆர்.வி. உதயகுமார், விஜய்யின் ஆரம்பகட்ட நடவடிக்கைகள் குறித்து பேசும்போது:“முதல்வராக பதவியேற்றதிலிருந்தே விஜய் சிறப்பாக செயல்பட்டு வருகிறார். அவர் வந்த உடனே பெரிய தொழில் நிறுவனத் தலைவர்களை சந்தித்து பேசியுள்ளார்.”என்று கூறினார்.

மேலும்,“தேவையற்ற இடங்களில் உள்ள மதுபானக் கடைகளை மூட உத்தரவிட்டுள்ளார். அம்மா உணவகங்களை மீண்டும் செயல்படுத்த நடவடிக்கை எடுத்துள்ளார். இவற்றையெல்லாம் பார்க்கும்போது மகிழ்ச்சியாகவும் நம்பிக்கையாகவும் உள்ளது.”என பாராட்டினார்.

விஜய்யின் அரசியல் பாணியை குறிப்பிட்ட ஆர்.வி. உதயகுமார்,“விஜய் ஆக்‌ஷன் ஹீரோ என்பதை ஆட்சியிலும் நிரூபித்துவிட்டார்” என்று தெரிவித்தார்.

தமிழ் சினிமாவில் பல வெற்றி படங்களை இயக்கியுள்ள ஆர்.வி. உதயகுமார், ‘சின்ன கவுண்டர்’, ‘எஜமான்’ உள்ளிட்ட படங்கள் மூலம் ரசிகர்களிடையே தனி இடம் பெற்றவர் என்பது குறிப்பிடத்தக்கது.

அவரைப் போன்ற மூத்த திரைப்பிரபலங்களும் விஜய்யின் ஆட்சியை நேர்மறையாக மதிப்பிடத் தொடங்கியிருப்பது, அரசியல் மற்றும் திரையுலக வட்டாரங்களில் கவனத்தை ஈர்த்துள்ளது.