தமிழ்நாடு முதலமைச்சராக பதவியேற்ற பிறகு, நடிகர் விஜய் பற்றிய செய்திகள் அரசியல் மற்றும் சமூக வலைதளங்களில் தொடர்ந்து பேசுபொருளாக இருந்து வருகின்றன. திமுக மற்றும் அதிமுக போன்ற பல ஆண்டுகளாக தமிழக அரசியலில் ஆதிக்கம் செலுத்திய கட்சிகளை பின்னுக்குத் தள்ளி ஆட்சியமைத்துள்ள விஜய்யின் அரசியல் பயணம் பலரின் கவனத்தையும் ஈர்த்துள்ளது.

இந்த நிலையில், விஜய்யின் நெருங்கிய உறவினரான விமலா ராணி அளித்துள்ள பேட்டி தற்போது சமூக வலைதளங்களில் வைரலாகி வருகிறது.

தனியார் யூடியூப் சேனல் ஒன்றுக்கு பேட்டியளித்த விமலா ராணி, விஜய்யின் தங்கை வித்யா குறித்து உருக்கமாக நினைவுகூர்ந்தார்.

அவர் கூறியதாவது:“விஜய்யின் தங்கை வித்யா இறந்தபோது நானும் சிறிய குழந்தைதான். வித்யா இறந்த நாள் என் அண்ணனின் பிறந்தநாளும் கூட. ஆனால் வித்யா மிகவும் கஷ்டப்பட்டார் என்பது எங்களுக்கு தெரியும். நிறைய மாத்திரைகள், ஊசிகள் என சிகிச்சை எடுத்துக் கொண்டிருந்தார்.”

மேலும் அவர் கூறுகையில்,“வித்யா இருந்திருந்தால் நன்றாக இருந்திருக்கும் என்று இப்போதும் தோன்றும். ஒரு குழந்தையை இழப்பதை யாரும் விரும்பமாட்டார்கள். உடன்பிறந்தவர்கள் என்பது எப்போதும் ஒரு பலம். அந்த பலம் விஜய்க்கு இல்லாமல் போய்விட்டது.”

விஜய்யின் தற்போதைய மக்கள் ஆதரவை குறிப்பிட்ட விமலா ராணி,“ஒரு தங்கையை இழந்தாலும் இன்று பல தங்கைகளை விஜய் சம்பாதித்திருக்கிறார். அந்த வலி இப்போது அவருக்கு பல மடங்கு அன்பாக திரும்பி வந்திருக்கிறது” என்று உணர்ச்சிபூர்வமாக தெரிவித்தார்.

முதல்வராக பதவியேற்ற பிறகு விஜய்யின் ஒவ்வொரு செயல்பாடும் மக்கள் மத்தியில் கவனத்தை ஈர்த்து வருகிறது. தலைமைச் செயலகத்தில் நேரத்திற்கு முன்பாக வருவது, எளிமையான அணுகுமுறை, முந்தைய ஆட்சிகளின் நல்ல திட்டங்களை தொடர்வது போன்றவை பொதுமக்களிடையே வரவேற்பைப் பெற்றுள்ளன.

அதேநேரத்தில், அவரது குடும்ப வாழ்க்கை தொடர்பான தகவல்களும் தொடர்ந்து பேசப்பட்டு வருகின்றன. குறிப்பாக, மனைவி சங்கீதாவுடன் ஏற்பட்டிருக்கும் விவாகரத்து வழக்கு தொடர்பான விவகாரமும் சமூக வலைதளங்களில் விவாதமாக இருந்து வருகிறது.

இந்த சூழலில், குடும்ப உறவினரின் இந்த உணர்ச்சிப்பூர்வமான பேட்டி, விஜய்யின் தனிப்பட்ட வாழ்க்கையின் மறுபக்கத்தை ரசிகர்களுக்கு நினைவூட்டியுள்ளதாக பார்க்கப்படுகிறது.