கிராண்ட் சுவிஸ் செஸ் அரங்கில்...முதல் சுற்றிலேயே மிரட்டிய குகேஷ்...!

உஸ்பெகிஸ்தானின் சமர்கண்ட் நகரில் ‘பிடே கிராண்ட் சுவிஸ்’ சர்வதேச சதுரங்கப் போட்டி 11 சுற்றுகளுடன் ஓபன் மற்றும் மகளிர் பிரிவாக நடைபெற்று வருகிறது. இதில் ஒவ்வொரு பிரிவிலும் முதல் 2 இடங்களைப் பிடிக்கும் வீரர்/வீராங்கனைகள் அடுத்த ஆண்டு நடைபெறும் கேண்டிடேட்ஸ் செஸ் போட்டிக்கு தகுதி பெறுவர்.

இந்த முதல் சுற்று ஆட்டத்தில், உலக சாம்பியனும் தமிழக வீரருமான குகேஷ், கருப்பு காய்களுடன் விளையாடி, பிரான்சின் எடினி பாக்ரோட்டை 45-வது நகர்த்தலில் வீழ்த்தி வெற்றியைப் பதிவு செய்தார்.

அதே போல், மற்றொரு தமிழக நட்சத்திரம் பிரக்ஞானந்தா, அமெரிக்காவின் ஜெப்ரி ஜியோங்குடன் 31-வது நகர்த்தலில் டிரா செய்தார்.மேலும், மகளிர் பிரிவில், தமிழகத்தின் ஆர். வைஷாலி, உஸ்பெகிஸ்தானின் குல்ருக்பெகிமை 56-வது நகர்த்தலில் வெற்றி கொண்டார்.

அதேபோல், இந்தியாவின் வந்திகா அகர்வால், உக்ரைன் வீராங்கனை யூலியா ஒஸ்மாக்கை தோற்கடித்தார். இந்தியாவின் ஹரிகா மற்றும் இஸ்ரேலின் மார்செல் எப்ரோம்ஸ்கி இடையேயான ஆட்டம் டிராவாக முடிந்தது.