உலகக் கோப்பை கால்பந்து : மெஸ்ஸியின் அர்ஜென்டினா அரையிறுதிக்கு முன்னேற்றம்.. பிரேசில் அவுட்.!

2022 பிஃபா கால்பந்து உலகக்கோப்பை போட்டியானது கத்தார் நாட்டில் நடைபெற்று வருகிறது. இந்த உலகக் கோப்பையில் 32 நாடுகள் பங்கேற்கின்றனர்.

அவை 8 பிரிவுகளாக பிரிக்கப்பட்டு ஒவ்வொரு பிரிவிலும் 4 அணிகள் இடம்பெற்றன. லீக் போட்டிகளின் முடிவில் ஒவ்வொரு பிரிவிலும் முதல் 2 இடங்களை பிடிக்கும் அணிகள் நாக்-அவுட் ரவுண்டான 2-வது சுற்றுக்கு முன்னேறும்.

அதன்படி, நெதர்லாந்து, செனகல், அர்ஜென்டினா, போலந்து, இங்கிலாந்து, அமெரிக்கா, பிரான்ஸ், ஆஸ்திரேலியா, ஜப்பான், ஸ்பெயின், மொராக்கோ, குரோஷியா, பிரேசில், சுவிட்சர்லாந்து, போர்ச்சுக்கல், தென் கொரியா ஆகிய 16 அணிகள் 2 ஆவது சுற்றுக்கு தகுதி பெற்றிருந்தது.

அதனைத் தொடர்ந்து நடைபெற்ற நாக் அவுட் சுற்று போட்டியில் இருந்து காலிறுதி போட்டிக்கு நெதர்லாந்து, குரோஷியா, பிரேசில், அர்ஜெண்டினா, இங்கிலாந்து, பிரான்ஸ், போர்ச்சுகல் மற்றும் மொரோக்கோ ஆகிய 8 நாடுகள் காலிறுதிக்கு தகுதி பெற்றுள்ளது.

இந்த நிலையில் உலக கோப்பை கால்பந்து காலிறுதி போட்டிகள் நேற்று முதல் நடைபெற்று வருகிறது.

இதில், நேற்று இரவு 8.30 மணிக்கு நடைபெற்ற முதல் காலிறுதிப் போட்டியில் குரோஷியா – பிரேசில் அணிகள் மோதின. முதல் 90 நிமிடங்களில் இரு அணிகளும் கோல்கள் அடிக்கப்படவில்லை.

அதனைத் தொடர்ந்து கூடுதல் நேரத்தில் இரு அணிகளும் தலா ஒரு கோல் அடிக்க 1-1 என்ற கணக்கில் சமநிலையில் இருந்தது. இதனையடுத்து பெனால்டி ஹுட் அவுட் முறையில் குரேஷியா அணி 4-2 என்ற கணக்கில் பிரேசிலை வீழ்த்தி அரையிறுதிக்கு முன்னேறியது.

அதனைத் தொடர்ந்து நள்ளிரவு 12.30 மணிக்கு நடைபெற்ற இரண்டாவது கால் இறுதி போட்டியில் நெதர்லாந்து – அர்ஜெண்டினா அணிகள் மோதின. இதில் 90 நிமிடங்கள் முடிவில் இரு அணிகளும் 2-2 என்ற கணக்கில் சமநிலையில் இருந்ததால் கூடுதல் நேரம் வழங்கப்பட்டது. அதில் இரு அணிகளும் எந்த கோலும் அடிக்கப்படவில்லை.

இதனையடுத்து பெனால்டி ஹுட் அவுட் முறையில் அர்ஜென்டினா அணி 4-3 என்ற கணக்கில் நெதர்லாந்தை வீழ்த்தி அரையிறுதிக்கு முன்னேறியது.

அதனைத் தொடர்ந்து டிசம்பர் 14ம் தேதி நடைபெறும் முதல் அரையிறுதி போட்டியில் அர்ஜென்டினா குரேஷியா அணிகள் மோதுகின்றன.