அமெரிக்காவில் பணிபுரிய வெளிநாட்டினருக்கு எச்-1பி விசா வழங்கப்பட்டு வருகிறது. இதற்கிடையே எச்-1பி விசா கட்டணத்தை 1 லட்சம் அமெரிக்க டாலர்களாக இந்திய மதிப்பில் ரூ.88 லட்சமாக அதிபர் டிரம்ப் உயர்த்தினார். அமெரிக்காவின் வேலை வாய்ப்புகளில் அமெரிக்கர்களுக்கே முன்னுரிமை அளிக்கும் நோக்கில் இந்த நட வடிக்கை எடுக்கப்பட்டதாக அந்நாட்டு அரசு தெரிவித்தது. 

இந்த நிலையில், தெலுங்கானா மாநிலத்தில் உள்ள சில்கூரில் உள்ள பாலாஜி கோவிலில், சிறப்பு வழிபாடு செய்தால் வெளிநாடு விசா கிடைக்கும் என்று பக்தர்களால் நம்பப்படுகிறது. அதனால், இந்தக் கோவில் ‘விசா பாலாஜி கோவில்’ என்றும் அழைக்கப்படுகிறது.

இந்த கோவில் மாணவர்கள் மற்றும் தொழில் வல்லுநர்கள் மத்தியில், குறிப்பாக அமெரிக்காவில் பணிபுரிய விரும்பும் ஐடி துறையில் உள்ளவர்களிடையே பிரபலமாக உள்ளது. இந்த கோவில் விசா பிரார்த்தனைகளுடன் தொடர்புடையதாக மட்டுமல்லாமல், பண நன்கொடைகளை மறுக்கும் அதன் நீண்டகால கொள்கைக்காகவும் தனித்து நிற்கிறது. 

கோவிலில் 'உண்டியல்' மற்றும் நன்கொடை பெட்டிகள் இல்லை, பக்தர்களிடமிருந்து பணம் ஏற்றுக்கொள்ளப்படுவதில்லை. கூடுதலாக, விஐபி பார்வையாளர்களுக்கு எந்த சிறப்பு வசதியும் வழங்கப்படுவதில்லை. தினமும் இந்தக் கோவிலுக்கு ஏராளமான பக்தர்கள் வருகைத் தருகின்றனர்.