தமிழக சட்டமன்றத்தில் முதலமைச்சர் விஜய் ஆற்றிய உரையின் போது, அவர் பார்ட்டி ஃபண்ட் என்று குறிப்பிட்ட உடனேயே திமுக உறுப்பினர்கள் ஏன் பயந்து அவையிலிருந்து வெளிநடப்பு செய்தார்கள் என்று தெரியவில்லை என அமைச்சர் நிர்மல் குமார் செய்தியாளர்கள் சந்திப்பில் கேள்வி எழுப்பியுள்ளார். எதிர்க்கட்சித் தலைவர் உதயநிதி ஸ்டாலின் தனது அறையில் அமர்ந்து முதலமைச்சரின் உரையைக் கேட்டுவிட்டு, பின்னர் செய்தியாளர்களைச் சந்தித்ததற்கு அவர் தனது நன்றியைத் தெரிவித்துக் கொண்டார். ஒவ்வொரு தலைவருக்கும் ஒரு தனித்துவமான பாணி இருக்கும் என்று குறிப்பிட்ட அவர், அன்று எம்ஜிஆரை எப்படியெல்லாம் விமர்சித்தார்களோ, அதே பழைய டெக்னிக்கைப் பயன்படுத்திதான் இன்றும் சிலர் முதல்வர் விஜய்யை விமர்சித்து வருகிறார்கள் என்றார்.

கடந்த திமுக ஆட்சியில் லஞ்சம் மற்றும் புரோக்கர்களின் ஆதிக்கம் மிக அதிகமாக இருந்தது என்று குற்றம் சாட்டிய அமைச்சர் நிர்மல் குமார், முந்தைய ஆட்சியில் பணம் இல்லாமல் எந்தவொரு பணி மாறுதலும் நடக்கவில்லை என்றார். கடந்த ஆட்சியில் சாமானிய மக்கள் சட்டமன்றத்திற்குள்ளோ அல்லது அமைச்சர்களைப் பார்க்கவோ வர முடியாமல் புரோக்கர்கள் மட்டுமே வலம் வந்ததாகவும், ஆனால் தற்போதைய தவெக ஆட்சியில் ஏழை எளிய மக்கள் நேரடியாக அமைச்சர்களைச் சந்தித்து தங்களின் குறைகளைக் கூறி தீர்வு கண்டு வருவதாகவும் அவர் பெருமிதம் தெரிவித்தார். ஒவ்வொரு துறைக்கும் தனி உதவியாளர்களை நியமித்து வசூல் வேட்டை நடத்தியது முந்தைய அரசுதான் என்றும் அவர் சாடினார்.

அதிமுக பொதுச்செயலாளர் எடப்பாடி பழனிசாமியைச் சந்திக்க நேரம் கேட்ட விவகாரம் குறித்துப் பேசிய அவர், தற்போது அதிமுகவில் உட்கட்சிப் பிரச்சினை உச்சத்தில் இருப்பதால் இந்தச் சந்திப்பு தற்போதைக்குச் சரியாக இருக்காது என அவர்கள் தரப்பில் கூறப்பட்டதாகத் தெரிவித்தார். எடப்பாடி பழனிசாமிக்கு என்று தனிப்பட்ட நேரடித் தொடர்பு எண் இல்லை என்றும், அவரைச் சுற்றியிருக்கும் சில நபர்கள் மூலமாகவே பேச வேண்டியுள்ளது என்றும் குறிப்பிட்ட அவர், இதனால் மரியாதை நிமிர்த்தமாக அதிமுகவின் அடுத்தகட்ட தலைவர்களைச் சந்திக்கத் திட்டமிட்டதாக விளக்கமளித்தார். இந்தச் சந்திப்பை வைத்து தவெக அரசு சட்டமன்ற வாக்கெடுப்பில் வெற்றி பெறவில்லை என்றும் அவர் தெளிவுபடுத்தினார்.

நான் முதல்வன் திட்டம் முடக்கப்படவில்லை என்று தெளிவுபடுத்திய அமைச்சர், அரசுத் திட்டங்களின் பெயர்கள் அதன் செயல்பாட்டைப் பிரதிபலிக்கும் வகையில் இருக்க வேண்டும் என்றும், தற்போதைய பெயரில் குழப்பம் நீடிப்பதால் அதைச் சீரமைக்க நடவடிக்கை எடுக்கப்பட்டு வருவதாகவும் கூறினார். திமுகவினர் தங்களின் பார்ட்டி ஃபண்ட் குறித்துப் பேசும் முன்பு, அக்கட்சியின் முன்னாள் அமைச்சர் பிடிஆர் பேசிய முப்பதாயிரம் கோடி ரூபாய் ஆடியோ விவகாரம் குறித்து அவரிடமே கேட்டுத் தெரிந்து கொள்ள வேண்டும் என்றும், அது குறித்து விசாரணை நடத்தலாமா வேண்டாமா என்று சவால் விடுத்தார். தற்போதைய தவெக ஆட்சியில் சட்டவிரோத பார்ட்டி ஃபண்ட் வசூல் முற்றிலும் ஒழிக்கப்பட்டுவிட்டதாகவும், சட்டம் ஒழுங்கு சீராக உள்ளதாகவும் கூறி அவர் தனது பேட்டியை நிறைவு செய்தார்.