தமிழக சட்டமன்றத்தில் ஆளுநர் உரைக்கு நன்றி தெரிவிக்கும் தீர்மானத்தின் மீது உரையாற்றிய முதலமைச்சர் விஜய், தனது கட்சியான தமிழக வெற்றிக் கழகத்தின் தோற்றம் மற்றும் அதன் குறுகிய கால அரசியல் பயணம் குறித்துப் பேசினார். கடந்த 2024ஆம் ஆண்டு தவெக தொடங்கப்பட்டதில் இருந்தே மக்கள் நலன் சார்ந்த விவகாரங்களில் தீவிரமாகப் பங்காற்றி வருவதாக அவர் குறிப்பிட்டார். கட்சி தொடங்கப்பட்ட உடனேயே மத்திய அரசின் குடியுரிமைத் திருத்தச் சட்டத்திற்கு (சிஏஏ) எதிராகத் தவெக சார்பில் மிகத் தெளிவான கண்டன அறிக்கை வெளியிடப்பட்டதை அவர் அவையில் நினைவு கூர்ந்தார். அதனைத் தொடர்ந்து விக்கிரவாண்டியில் நடத்தப்பட்ட தவெகவின் வரலாற்றுச் சிறப்புமிக்க முதலாவது மாநில மாநாடு, கட்சியின் அடுத்தகட்ட வளர்ச்சிக்கு மிக முக்கிய அடித்தளமாக அமைந்தது என்றும் அவர் பெருமிதத்துடன் தெரிவித்தார்.

தங்களின் அரசியல் பாதையை வழிநடத்த ஐந்து முக்கிய கொள்கைத் தலைவர்களைத் தவெக அதிகாரப்பூர்வமாகத் தேர்ந்தெடுத்துள்ளதாக முதலமைச்சர் விஜய் விளக்கமளித்தார். தந்தை பெரியார், பெருந்தலைவர் காமராசர், அண்ணல் அம்பேத்கர் ஆகியோருடன் வீரமங்கை வேலுநாச்சியர் மற்றும் மக்கள் சேவகர் அஞ்சலையம்மாள் ஆகிய இரு பெண் ஆளுமைகளையும் தங்களின் கொள்கைத் தலைவர்களாக அறிவித்துள்ளதாகக் கூறினார். இதன் மூலம் ஒட்டுமொத்த இந்தியாவிலேயே இரண்டு பெண் விடுதலைப் போராட்ட வீரர்களைத் தங்களின் முதன்மைக் கொள்கைத் தலைவர்களாகக் கொண்டுள்ள ஒரே அரசியல் கட்சி தமிழக வெற்றிக் கழகம் மட்டும்தான் என்ற வரலாற்றுச் சிறப்பையும் அவர் சட்டமன்றத்தில் பதிவு செய்தார்.

தந்தை பெரியாரின் கொள்கைகளைத் தவெக எவ்வாறு அணுகுகிறது என்பது குறித்தும் முதலமைச்சர் விஜய் மிகத் தெளிவான விளக்கத்தை அளித்தார். பெரியார் சமூகத்திற்குச் சொன்ன அறிவுரைகளில் தங்களுக்கு ஏற்புடைய கருத்துகளை மட்டுமே கட்சி எடுத்துக்கொண்டுள்ளதாக அவர் ஓப்பனாகத் தெரிவித்தார். குறிப்பாக, பெரியாரின் கடவுள் மறுப்புக் கொள்கையில் தவெகவுக்கு எவ்வித உடன்பாடும் இல்லை என்பதைத் தொடக்கத்திலேயே தங்களின் கட்சி வெளிப்படையாக அறிவித்துவிட்டது என்றார். தங்களுக்குக் கடவுள் மீது அசைக்க முடியாத நம்பிக்கை உண்டு என்றும், அதே நேரத்தில் தாங்கள் யாருடைய தனிப்பட்ட மத நம்பிக்கைக்கும் எதிரானவர்கள் அல்ல என்பதையும் அவர் திட்டவட்டமாகக் கூறினார்.

இருப்பினும், பெரியார் முன்வைத்த பெண் கல்வி, பெண் சீர்திருத்தம் மற்றும் சமூக சமத்துவம் போன்ற முற்போக்கான பல கொள்கைகளைத் தவெக முழு மனதுடன் ஏற்றுக்கொண்டுள்ளதாகவும், அவற்றின் அடிப்படையிலேயே தற்போதைய தவெக அரசு தமிழகத்தில் பெண்களுக்கான பல்வேறு நலத்திட்டங்களை முன்னெடுத்து வருவதாகவும் முதலமைச்சர் விஜய் தனது உரையில் தெளிவுபடுத்தினார்

.