தமிழகத்தின் நீர்நிலைகளை பாதுகாக்கும் வகையில், அங்கு செயல்பட்டு வரும் கழிவுநீர் சுத்திகரிப்பு நிலையங்கள் மற்றும் அவற்றில் பொருத்தப்பட்டுள்ள கருவிகள் அனைத்தும் முறையாக இயங்குகின்றனவா என்பதை அரசு உடனடியாக ஆய்வு செய்ய வேண்டும் என்று தமிழக பா.ஜ.க. தலைவர் நயினார் நாகேந்திரன் வலியுறுத்தியுள்ளார்.திருச்சி மாவட்டம் பஞ்சப்பூர் பகுதியில் செயல்பட்டு வரும் கழிவுநீர் சுத்திகரிப்பு நிலையத்தின் கருவிகள் பழுதடைந்துள்ளதாகவும், இதன் காரணமாக சுத்திகரிக்கப்படாத கழிவுநீர் கோரையாற்றில் கலப்பதாகவும் தகவல்கள் வெளியாகியுள்ளன.

மேலும், சுத்திகரிப்பு நிலையத்தின் தொட்டிகளில் கழிவுநீர் நிரம்பி வழிந்து, சுற்றுவட்டாரப் பகுதிகளில் தேங்கி நிற்பதால் சுகாதார பாதிப்பு ஏற்படும் சூழல் உருவாகியுள்ளதாக தெரிவிக்கப்படுகிறது.இதுகுறித்து நயினார் நாகேந்திரன் வெளியிட்டுள்ள அறிக்கையில் கூறியிருப்பதாவது,"பஞ்சப்பூர், கருமண்டபம், எடமலைப்பட்டி, உறையூர் உள்ளிட்ட பகுதிகள் வழியாக பாய்ந்து செல்லும் கோரையாறு, காவிரி ஆற்றில் கலக்கிறது.

திருச்சி மாநகரத்தின் முக்கியமான நீராதாரங்களில் ஒன்றாக விளங்கும் இந்த ஆறு, சுமார் 75 கிலோமீட்டர் நீளத்தை கொண்டதாகும். இதன் வடிநிலப் பகுதிகளில் அமைந்துள்ள ஏராளமான பாசனக் குளங்கள் வாயிலாக ஆயிரக்கணக்கான ஏக்கர் விவசாய நிலங்களும் பயன்பெறுகின்றன.

இந்த நிலையில், சுத்திகரிக்கப்படாத கழிவுநீர் ஆற்றில் கலப்பது நீரின் தரத்தையும், சுற்றுச்சூழலையும் பாதிக்கும் அபாயத்தை ஏற்படுத்துகிறது. குறிப்பாக, காவிரி ஆற்றை சார்ந்துள்ள குடிநீர் மற்றும் விவசாய தேவைகளிலும் இதன் தாக்கம் ஏற்படக்கூடும்.காவிரி நீர் வரத்து தொடர்பாக ஏற்கனவே பல்வேறு பிரச்சினைகள் நிலவி வரும் சூழலில், தமிழகத்தில் கிடைக்கும் நீரை பாதுகாப்பாகவும் சுகாதாரமான முறையிலும் பராமரிப்பதில் அரசு கூடுதல் கவனம் செலுத்த வேண்டும்.

ஆனால், தமிழகத்தில் செயல்பட்டு வரும் நீர்நிலைகள் மற்றும் கழிவுநீர் சுத்திகரிப்பு நிலையங்களின் செயல்பாடுகளை முழுமையாக கண்காணிப்பதற்கு பதிலாக, வேறு நடவடிக்கைகளுக்கு அரசு முன்னுரிமை அளித்து வருவதாக நயினார் நாகேந்திரன் விமர்சித்துள்ளார்.மேலும், தமிழக நீர்நிலைகளில் அமைக்கப்பட்டுள்ள கழிவுநீர் சுத்திகரிப்பு கருவிகள் அனைத்தும் தற்போது நல்ல நிலையில் உள்ளனவா, அவை முழுமையான திறனுடன் செயல்படுகின்றனவா என்பதை அரசு உடனடியாக ஆய்வு செய்ய வேண்டும் என்றும் அவர் வலியுறுத்தியுள்ளார்.

மக்களின் குடிநீர் தேவையையும், விவசாயிகளின் வாழ்வாதாரத்தையும் கருத்தில் கொண்டு, கழிவுநீர் சுத்திகரிப்பு நிலையங்களில் ஏற்படும் பழுதுகளை தாமதமின்றி சரிசெய்து, சுத்திகரிக்கப்படாத கழிவுநீர் ஆறுகள் மற்றும் நீர்நிலைகளில் கலப்பதை தடுக்க உரிய நடவடிக்கை எடுக்க வேண்டும் என்றும் அவர் கேட்டுக்கொண்டுள்ளார்.இவ்வாறு நயினார் நாகேந்திரன் தெரிவித்துள்ளார்.