தமிழக அரசியல் வரலாற்றில் மிக முக்கியமான ஒரு திருப்புமுனையாக, தமிழக வெற்றிக் கழகத்தின் தலைவர் விஜய் இன்று மாலை 3.30 மணிக்கு சென்னை கிண்டியில் உள்ள ஆளுநர் மாளிகையில் தமிழக ஆளுநரை நேரில் சந்திக்கவுள்ளார். நடந்து முடிந்த சட்டமன்றத் தேர்தலில் 108 இடங்களைக் கைப்பற்றி தனிப்பெரும் கட்சியாக உருவெடுத்துள்ள தவெக, ஆட்சி அமைப்பதற்கான இறுதிக்கட்ட ஆயத்தப் பணிகளில் தீவிரமாக ஈடுபட்டு வருகிறது. இந்தச் சூழலில் ஆளுநருடனான இந்தச் சந்திப்பு தேசிய அளவிலும் மாநில அளவிலும் பெரும் எதிர்பார்ப்பை ஏற்படுத்தியுள்ளது.

தமிழகச் சட்டமன்றத்தில் மொத்தமுள்ள 234 இடங்களில் ஆட்சி அமைக்க 118 இடங்கள் தேவை என்ற நிலையில், எந்த ஒரு தனித்த கட்சிக்கும் அறுதிப் பெரும்பான்மை கிடைக்கவில்லை. இதனையடுத்து, ஒரு நிலையான அரசை அமைக்கும் நோக்கில் விஜய் தலைமையிலான தமிழக வெற்றிக் கழகத்திற்கு காங்கிரஸ் ஆதரவு கொடுத்துள்ளது.

மேலும், விடுதலைச் சிறுத்தைகள், இந்திய கம்யூனிஸ்ட் மற்றும் மார்க்சிஸ்ட் கம்யூனிஸ்ட் ஆகிய கட்சிகளிடம் அதிகாரப்பூர்வமாக ஆதரவு கோரியிருந்தது. இந்தக் கட்சிகளும் தங்களது ஆதரவை தவெகவிற்கு வழங்க முன்வந்திருப்பதாகத் தகவல்கள் உறுதியாகியுள்ளன. இதன் மூலம் தவெக கூட்டணியின் பலம் ஆட்சி அமைக்கத் தேவையான பெரும்பான்மையை எளிதாகக் கடந்துள்ளது.

நேற்று நடைபெற்ற தமிழக வெற்றிக் கழகத்தின் புதிய சட்டமன்ற உறுப்பினர்கள் ஆலோசனைக் கூட்டத்தில், கட்சியின் சட்டமன்றக் குழுத் தலைவராக விஜய் ஒருமனதாகத் தேர்ந்தெடுக்கப்பட்டார். அதனைத் தொடர்ந்து, இன்று மாலை நடைபெறும் இந்த முக்கியச் சந்திப்பின் போது, தமக்கு ஆதரவு அளித்துள்ள கூட்டணிக் கட்சிகளின் சட்டமன்ற உறுப்பினர்களின் ஆதரவுக் கடிதங்களை ஆளுநரிடம் விஜய் முறைப்படி சமர்ப்பிப்பார் என எதிர்பார்க்கப்படுகிறது. மேலும், பெரும்பான்மை சட்டமன்ற உறுப்பினர்களின் ஆதரவு தமக்கு இருப்பதை உறுதிசெய்து, புதிய அரசை அமைக்கத் தமக்கு அழைப்பு விடுக்குமாறு ஆளுநரிடம் அவர் அதிகாரப்பூர்வமாக உரிமை கோரவுள்ளார்.

இந்தச் சந்திப்பு நிறைவடைந்தவுடன், புதிய முதலமைச்சராக விஜய் பதவியேற்கும் தேதி, இடம் மற்றும் நேரம் குறித்த அதிகாரப்பூர்வ அறிவிப்பு ஆளுநர் மாளிகையிலிருந்து வெளியாகும் என்று அரசியல் வட்டாரங்கள் தெரிவிக்கின்றன.

பல தசாப்தங்களாகத் திராவிடக் கட்சிகளின் ஆதிக்கத்தில் இருந்த தமிழக அரசியல் களம், தற்போது தவெகவின் வருகையால் புதிய பரிணாமத்தை அடைந்துள்ளது. தொண்டர்களும் பொதுமக்களும் புதிய முதலமைச்சரின் பதவியேற்பு விழாவிற்கான அறிவிப்பை மிகுந்த ஆவலுடன் எதிர்நோக்கிக் காத்திருக்கின்றனர். ஆளுநருடனான இந்தச் சந்திப்பு தமிழக அரசியல் வரலாற்றில் ஒரு புதிய அத்தியாயத்தின் தொடக்கமாக அமையப் போகிறது.