த.வெ.க. தலைவர் விஜய்யைப் பற்றி தி.மு.க.வினர் பேசுவதிலிருந்து, அவர்களுக்குத் தமிழக வெற்றிக் கழகம் (த.வெ.க.) என்றால் அலர்ஜி என்பது தெரிவதாக அ.ம.மு.க. பொதுச்செயலாளர் டி.டி.வி. தினகரன் விமர்சித்துள்ளார்.

திருச்சியில் செய்தியாளர்களைச் சந்தித்த அவர் தெரிவித்தாவது, "எஸ்.ஐ.ஆர். பணி: 95 சதவீதம் எஸ்.ஐ.ஆர். படிவங்கள் விநியோகம் செய்யப்பட்டுள்ளது. அரசியல் கட்சிகள் தங்கள் பகுதியில் வாக்குரிமை பெற்றுத் தரும் கடமையைச் செய்து வரும் நிலையில், எதற்காகக் குற்றம் சாட்டுகிறார்கள் எனத் தெரியவில்லை. மத்திய எஸ்.ஐ.ஆர். பணி சரியாகத்தான் நடைபெறுகிறது.

நெல் கொள்முதல்: நல்ல விளைச்சல் இருந்தும், மழையால் நெல் அறுவடை பாதிக்கப்படுகிறது. எனவே, மத்திய அரசு விவசாயிகளின் கோரிக்கையை ஏற்று, நெல் கொள்முதலில் ஈரப்பதத்தை 22% ஆக ஏற்றுக்கொள்ள வேண்டும். இது தி.மு.க.வின் கோரிக்கை அல்ல, விவசாயிகளின் கோரிக்கை.

மெட்ரோ அரசியல்: கோவை, மதுரைக்கு மெட்ரோ ரயில் வேண்டும் என்பது மக்களின் தேவை. மாநில அரசு கேட்டால் மத்திய அரசு உதவ வேண்டும். "நான் ஆட்சிக்கு வந்தால் கொண்டு வருவேன்" என்று எடப்பாடி பழனிசாமி பேசுவது, மக்கள் தேவையை காழ்ப்புணர்ச்சியுடன் அணுகுவது போல் உள்ளது.

சட்டம்-ஒழுங்கு: சட்டம்-ஒழுங்கைக் கையில் வைத்துள்ள முதல்வர் மு.க. ஸ்டாலின், போதைப் பொருள் பழக்கத்தால் அதிகரித்து வரும் கொலை, கொள்ளையைத் தடுக்காவிட்டால், அது தேர்தலில் தி.மு.க.வுக்கு எதிரொலிக்கும்.

கூட்டணி: கூட்டணி குறித்துத் தங்களிடம் பேச்சுவார்த்தை நடந்து வருவதாகவும், அது உறுதியான பின் அறிவிப்பதாகவும் அவர் தெரிவித்தார்.