தமிழக அரசியலில் முக்கியமான மற்றும் சென்சிட்டிவ் பகுதியாகக் கருதப்படும் தேனி மாவட்டத்தில் தற்போது அரசியல் சூழல் பரபரப்பாக மாறியுள்ளது. ஒரு காலத்தில் அதிமுகவின் பலமான கோட்டையாக இருந்த இந்த மாவட்டத்தை கடந்த சில ஆண்டுகளில் திமுக கைப்பற்றிய நிலையில், முன்னாள் முதல்வர் ஓ.பன்னீர்செல்வம் (ஓபிஎஸ்) திமுக முகாமில் இணைந்தது அங்கு புதிய அரசியல் அதிர்வுகளை ஏற்படுத்தியுள்ளது.

ஓபிஎஸ் திமுகவில் இணைந்தபோது அவரை அண்ணா அறிவாலயத்தில் நேரடியாக வரவேற்றவர் தங்க தமிழ்ச்செல்வன். ஆனால் தற்போது தேனி மாவட்ட அரசியலில் அவர்களுக்குள் உள்ள சமநிலை சிக்கலாக மாறி இருப்பதாக அரசியல் வட்டாரங்கள் கூறுகின்றன. தேனி மாவட்டத்தில் திமுக அமைப்பில் இரண்டு மாவட்ட செயலாளர்கள் உள்ளனர்.

தேனி வடக்கு மாவட்டம் – தங்க தமிழ்ச்செல்வன்
தேனி தெற்கு மாவட்டம் – கம்பம் ராமகிருஷ்ணன்

போடி மற்றும் பெரியகுளம் தொகுதிகள் தங்க தமிழ்ச்செல்வன் கட்டுப்பாட்டில் உள்ளன. ஆண்டிப்பட்டி மற்றும் கம்பம் தொகுதிகள் கம்பம் ராமகிருஷ்ணன் பொறுப்பில் உள்ளன. இந்த அரசியல் அமைப்பில் ஓபிஎஸ் களம் இறங்கியதும், ஏற்கனவே இருந்த கோஷ்டி போட்டி மேலும் தீவிரமடைந்ததாக கூறப்படுகிறது.

தங்க தமிழ்ச்செல்வன் ஆதிக்கம் செலுத்தும் போடி தொகுதியில் ஓபிஎஸ் போட்டியிடலாம் என்ற தகவல் வெளியான நிலையில், சில கிராமங்களில் தேர்தலை புறக்கணிக்க வேண்டும் என்ற போஸ்டர்கள் ஒட்டப்பட்டதாக தகவல்கள் வெளியாகியுள்ளன. இதுவே மாவட்ட அரசியலில் உள்ள உட்கட்டளை பிரச்சினையை வெளிப்படுத்துகிறது.

அதே நேரத்தில் பெரியகுளம் தொகுதியில் தங்க தமிழ்ச்செல்வன் ஆதரவாளரான சரவணகுமார் தற்போது சிட்டிங் எம்எல்ஏவாக உள்ளார். இந்த முறை அவருக்கு சீட் கிடைக்காமல் போகலாம் என்றும், அந்த தொகுதி மார்க்சிஸ்ட் கம்யூனிஸ்ட் கட்சிக்கு ஒதுக்கப்படலாம் என்றும் அரசியல் வட்டாரங்களில் பேச்சு நிலவுகிறது.

இதற்கிடையில் ஆண்டிப்பட்டி தொகுதி மீண்டும் கவனத்தை ஈர்த்துள்ளது. இந்த தொகுதியின் தற்போதைய எம்எல்ஏ மகாராஜன் தனிப்பட்ட செல்வாக்குடன் உள்ளவர் எனக் கூறப்படுகிறது. ஆனால் இந்த தொகுதியில் ஓபிஎஸ் தனது மகன் ரவீந்திரநாத்துக்காக சீட் கேட்கிறார். அதே தொகுதியில் தங்க தமிழ்ச்செல்வன் தனது மகன் நிஷாந்த் குமாருக்கு சீட் கேட்டு முயற்சி செய்து வருகிறார். இதனால் திமுகவின் இரண்டு முக்கிய முகங்களும் நேருக்கு நேர் மோதும் நிலை உருவாகியுள்ளது.

இந்த உட்கட்சிப் போட்டியை அதிமுக தனது அரசியல் வாய்ப்பாக பயன்படுத்த முயற்சி செய்து வருவதாக கூறப்படுகிறது. ஓபிஎஸுக்கு எதிராக வலுவான வேட்பாளரை நிறுத்த எடப்பாடி பழனிசாமி பல விருப்பங்களை பரிசீலித்து வருகிறார்.

ஒரு திட்டத்தின் படி, போடி தொகுதியை அமமுகவுக்கு ஒதுக்கி டிடிவி தினகரன் மனைவி அனுராதாவை போட்டியிட வைக்கலாம் என்ற ஆலோசனையும் இடம்பெறுகிறது. அல்லது அதிமுக நேரடியாக போட்டியிட்டால், ஆண்டிப்பட்டி தொகுதியில் அனுராதாவை களம் இறக்க வாய்ப்பு இருக்கலாம் என்றும் கூறப்படுகிறது.

இதனால் தேனி மாவட்ட அரசியல் தற்போது மிகவும் பரபரப்பான கட்டத்தை எட்டியுள்ளது. திமுகவில் உருவாகியுள்ள இந்த கோஷ்டி மோதல் அதிமுகவுக்கு அரசியல் வாய்ப்பாக மாறுமா அல்லது திமுக தலைமை தலையிட்டு பிரச்சினையை சமாளிக்குமா என்பது வரும் நாட்களில் தெளிவாகும்.

ஒரு வகையில் பார்க்கும்போது, “வீட்டுச் சண்டை வெளியோர்க்கு லாபம்” என்ற பழமொழி தேனி மாவட்ட அரசியலுக்கு தற்போது பொருந்தும் சூழல் உருவாகியுள்ளது.